बारामती - पहिल्यांदा निवडणूकीला सामोरे गेलो तेव्हा माझे वय अवघे 26 वर्षांचे होते, त्या वेळी एका साखर कारखान्याचे अध्यक्ष माझे विरोधक होते....अशी आठवण ज्येष्ठ नेते शरद पवार यांना जागवली.

बारामतीतील राष्ट्रवादी कॉंग्रेस शरदचंद्र पवार गटाच्या भिगवण चौकातील कार्यालयास सोमवारी (ता. 11) पवार यांनी भेट दिली. त्या वेळी कार्यकर्त्यांशी संवाद साधताना पवार यांनी जुन्या आठवणींना उजाळा दिला.

ते म्हणाले, त्या वेळी मी साखर कारखान्याच्या अध्यक्षांना कसे पराभूत करणार अशी चर्चा होती मात्र ती निवडणूक युवापिढीने हातात घेतली, सायकलवर फिरुन प्रचार केला, लोकांनी मला निवडून दिले. त्यानंतर बारामती व महाराष्ट्राने कधीही मागे पाहायला लावले नाही. लोकांनी इतके प्रेम दिले की मी प्रचारालाही येत नसे, शेवटच्या सांगता सभेला मी यायचो.

बारामतीकरांच्या या प्रेमामुळे सरकार चालविण्याची संधी मला मिळाली, चार वेळा मुख्यमंत्री, केंद्रात संरक्षणमंत्री, कृषीमंत्री व इतर जबाबदा-या सांभाळत जे करणे शक्य होते ते केले. विनोदकुमार गुजर, धो.आ. सातव या सारख्या अनेकांनी याचा पाया घातला होता. लोकांमध्ये जागृती करुन मला निवडून दिले.

देशाच्या संसदेतील 588 खासदारांपैकी पहिल्या तीन खासदारात सुप्रिया सुळे यांचे नाव आहे याचा आनंद आहे. राजकारणात स्वच्छ कामाचा आदर्श तिने घालून दिला आहे. तीन निवडणूकीत विक्रमी मताधिक्याने सुप्रिया सुळे विजयी झाल्या.

यंदा चित्र काही वेगळेच आहे, पण तरीही चिंता करण्याचे कारण नाही, ज्यांना सगळी पदे मिळाली ते दिसत नाही, ज्यांना कसलीच पदे मिळाली नाहीत पण पदाधिका-यांना ज्यांनी मोठे केले ते आज इथे आहेत. तुतारी फुंकणारा माणूस ही खूण महाराष्ट्राला जागे करणारी आहे, राज्यात तिचा आवाज पोहोचेल, अशी अपेक्षा त्यांनी व्यक्त केली.