आपटाळे - शिवजयंती दोन दिवसांवर येऊन ठेपली असल्याने राज्यातील विविध भागातून पर्यटकांची पावले छत्रपती शिवरायांची जन्मभूमी असलेल्या किल्ले शिवनेरीकडे वळू लागली आहेत. शिवरायांच्या स्वराज्याचे वैभव दृष्टी नसल्यामुळे पाहता येत नसल्याची खंत न बाळगता निगडी येथील सुमारे १७ दृष्टिहिनांनी आपल्या मनचक्षूने आज किल्ले शिवनेरीवर सफर करत जाज्वल्य इतिहास अनुभवला.

शिवनेरीच्या सफरीमध्ये रामहरी भोसले, चंद्रकांत गायकवाड. प्रियांका भोसले, प्रेरणा गायकवाड, रूपाली गायकवाड, विनायक भोसले, सुनील सूर्यवंशी, राजू बानमारे, अनिता इंगवले यांसह अन्य दृष्टिहीन पर्यटकांचा सहभाग घेतला. निगडी येथील नेत्रहीन कल्याणकारी संघटनेने या उपक्रमाचे आयोजन केले होते. जालिंदर राणे यांनी नियोजन केले, तर जुन्नर येथील ज्ञानेश कुटे यांनी गडाची माहिती दिली. 

किल्ले शिवनेरीवर होत असलेल्या सुधारणांमुळे सुटीच्या दिवशी पर्यटकांचा ओघ वाढत चालला असून, दर रविवारी गर्दीचा उच्चांक वाढतच आहे. पर्यटकांनी किल्ले शिवनेरीचे पावित्र्य राखावे तसेच गडावर कचरा व विघातक कृत्य होणार नाही, याची खबरदारी घेण्याचे आवाहन वनपरिक्षेत्र अधिकारी अजित शिंदे यांनी केले आहे.