पुणे : अतिरिक्त विभागीय आयुक्त डॉ. अनिल रामोड यांची आता सक्त वसुली संचालनालयामार्फत (ईडी) चौकशी होण्याची शक्यता वर्तविण्यात येत आहे. याबाबत केंद्रीय गुन्हे अन्वेषण विभागाकडून (सीबीआय) ईडीला पत्र पाठविण्यात येणार असल्याची माहिती विश्वसनीय सूत्रांनी दिली. दरम्यान, डॉ. रामोडप्रकरणी सीबीआयकडून महसूल विभागातील काही अधिकाऱ्यांची चौकशी करण्यात येत आहे.

सोलापूर जिल्ह्यातील महामार्गावरील भूसंपादनाचा मोबदला शेतकऱ्यांना वाढवून देण्यासाठी अतिरिक्त आयुक्त डॉ. रामोड यांना आठ लाखांची लाच घेताना सीबीआयच्या लाचलुचपत प्रतिबंधक विभागाने ९ जून रोजी अटक केली होती. डॉ. रामोड यांना तीन दिवसांची सीबीआय कोठडी आणि त्यानंतर २७ जूनपर्यंत न्यायालयीन कोठडीत ठेवण्याचे आदेश न्यायालयाने दिले होते. त्यानंतर त्यांची येरवडा कारागृहात न्यायालयीन कोठडीत रवानगी करण्यात आली आहे.

डॉ. रामोड यांच्या घरझडतीमध्ये सहा कोटी ६४ लाखांची रोकड आणि कार्यालयातून एक कोटी २८ लाख रुपये जप्त करण्यात आले आहेत. आरोपीसह त्याच्या कुटुंबीयांच्या नावे विविध स्थावर मालमत्ता असून, त्याची किंमत पाच कोटी ३० लाख रुपये आहे. दरम्यान, डॉ. रामोड हे सीबीआयच्या अधिकाऱ्यांना तपासात सहकार्य करीत नाहीत. तसेच, त्यांच्या मालमत्तेबाबत आणखी काही कागदपत्रे आणि ऑडिओ क्लिप्स सीबीआयच्या हाती लागल्याची माहिती सूत्रांनी दिली.