बारामती - कोरोनाच्या पार्श्वभूमीवर दारुविक्री बंद असल्याने हातभट्टीच्या गावठी दारुचे उत्पादन चोरुन वाढविण्याचा प्रयत्न होत आहे. 

बारामतीचे उपविभागीय पोलिस अधिकारी नारायण शिरगावकर यांना मिळालेल्या गोपनीय माहितीवरुन बारामतीनजिक गुनवडी येथे हातभट्टी दारुची निर्मिती होत होती. त्या नुसार पोलिस निरिक्षक औदुंबर पाटील, सहायक पोलिस निरिक्षक योगेश शेलार, फौजदार पद्मराज गंपले यांच्या पथकाने छापा मारला असता तेथे मोठ्या प्रमाणावर गावठी दारुचे रसायन सापडले. 

बातम्या ऐकण्यासाठी डाऊनलोड करा ई-सकाळचे ऍप

बारामती शहर पोलिसांनी केलेल्या मोठ्या कारवाईत दोनशे लिटरचे सोळा बॅरेल रसायन व तीन लाखांची गावठी दारु व तयार करण्याचे पूरक साहित्य उध्वस्त करण्यात आले. या शिवाय इलेक्ट्रॉनिक् मोटार, वॉटर हिटर आदी साहित्य पोलिसांनी जप्त केले आहे. दरम्यान या गावठी दारु तयार करण्यासाठी वीजेचे कनेक्शनही महावितरणची दिशाभूल करुन घेतल्याचे पुढे आले आहे. या प्रकरणी गौतम तानाजी शिंदे व संतोष अण्णा कांबळे  यांच्यावर कारवाई करण्यात आली आहे. अलिकडच्या काळात झालेली शहर पोलिसांची ही सर्वात मोठी कारवाई असल्याचे नारायण शिरगावकर यांनी सांगितले.