कात्रज - राजस सोसायटी परिसरातील रामभाऊ म्हाळगी शाळेच्या आवारातील जीर्ण पाण्याच्या टाक्या महापालिकेकडून पाडण्यात आल्या आहेत. त्या जीर्ण झाल्याने विद्यार्थ्यांना धोका निर्माण झाला होता. याबाबत मागील अनेक दिवसांपासून शाळेकडून पाठपुरावा केला जात होता. मात्र, प्रशासनाला जाग येत नव्हती. त्यानंतर पाण्याच्या जीर्ण टाक्याचा विद्यार्थ्यांना धोका या मथळ्याखाली सकाळने वृत्त प्रसिद्ध केले होते.

महापालिकेच्या पाणीपुरवठा विभागाकडून याची दखल घेत जॉ कटरच्या सहाय्याने या टाक्या पाडण्यात आल्या आहेत. या टाक्या पाडल्याने विद्यार्थी आता निश्चिंत झाले असून कुठल्याही प्रकारचा धोका राहिला नसल्याची माहिती रामभाऊ म्हाळगी शाळेकडून देण्यात आली.

यावेळी माजी नगरसेविका राणी भोसले, पाणीपुरवठा विभागाचे उपअभियंता नितिन खुडे, शाखा अभियंता संदिप मिसाळ, संस्थेचे अध्यक्ष प्रविण ठाकूर, सचिव भालचंद्र खराईत, चित्रा ताम्हणकर, रायबा भोसले, मुख्याध्यापिका आरती राठोड, यशवंत हरिभक्त उपस्थित होते.

प्रतिक्रिया

आयुक्तांनी आदेश दिल्यानंतर पाणी पुरवठा विभागाचे मुख्य अभियंता यांनी याबाबत तत्काळ कार्यवाही करण्यास मान्यता दिल्याने या धोकादायक टाक्या जमीनदोस्त करण्यात आल्या. आता विद्यार्थ्यांना कोणत्याही प्रकारचा धोका नाही.

- नितीन खुडे, उपअभियंता पाणीपुरवठा विभाग