पिंपरी - शहरात सध्या दिवसाआड पाणीपुरवठा सुरू आहे. मात्र, नागरिकांना दुप्पट पाणीपुरवठा करण्याचा आदेश आमदार लक्ष्मण जगताप यांनी गुरुवारी चिंचवड येथे बैठकीत प्रशासनाला दिला. 

ताज्या बातम्यांसाठी डाऊनलोड करा ई-सकाळचे ऍप

शहरातील नागरिकांना समान पाणीवाटप व्हावे, यासाठी पाणीपुरवठा नियोजनाबाबत महापौर उषा ढोरे यांच्या अध्यक्षतेखाली प्राधिकरणातील जलशुद्धीकरण केंद्रात गुरुवारी (ता. ५) आढावा बैठक झाली. त्यात आमदार जगताप, उपमहापौर तुषार हिंगे, स्थायी समिती अध्यक्ष विलास मडिगेरी, सत्तारूढ पक्षनेता एकनाथ पवार, प्रभाग अध्यक्ष शशिकांत कदम, नगरसदस्य संदीप कस्पटे, नगरसेविका ममता गायकवाड, आयुक्त श्रावण हर्डीकर, मकरंद निकम, प्रवीण लडकत, रामदास तांबे आदी उपस्थित होते.

पाणीपुरवठा करताना येणाऱ्या तांत्रिक अडचणींबद्दल आमदार जगताप यांनी माहिती घेतली. पेठ क्रमांक २३ येथील जलशुद्धीकरण केंद्रातून डांगे चौकापर्यंतच्या वाहिनीमुळे शहरातील पाणीपुरवठ्यात सुधारणा होण्यास मदत होणार आहे. जलशुद्धीकरण केंद्र ते थेरगाव येथील डांगे चौकापर्यंतचे सुमारे ७.६० किलोमीटर लांबीपैकी ५.६० किलोमीटर लांबीचे काम पूर्ण झाले आहे. या कामाची माहिती घेतल्यानंतर जगताप यांनी उर्वरित काम १५ फेब्रुवारी २०२० पर्यंत पूर्ण करण्याचे आदेश दिले.