वालचंदनगर : इंदापूर तालुक्यातील श्री बाबीर देवस्थान व रुई गावच्या विकासासाठी पुणे जिल्हा परिषदेच्या माध्यमातून दीड वर्षाच्या कालावधीमध्ये 6 कोटी 90 लाख 52 हजार रुपयांचा विकासनिधी आणला असून, बाबीर देवस्थानच्या परिसराचा कायापालट झाला असल्याची माहिती पुणे जिल्हा परिषदेचे बांधकाम व आराेग्य समितीचे सभापती प्रवीण माने यांनी दिली.

इंदापूर तालुक्यातील श्री बाबीरच्या यात्रेस गुरुवार (ता. ८) पासून सुरवात झाली. तीन दिवस यात्रा सुरु असते. या यात्रेसाठी राज्यातून तसेच परराज्यातून लाखो भाविक येत असतात. भाविकांना यात्रेच्या काळामध्ये सुविधा मिळाव्यात यासाठी दीड वर्षापासून पुणे झेडपीचे बांधकाम व आराेग्य समितीचे सभापती प्रवीण माने प्रयत्नशील असून, त्यांनी दीड वर्षाच्या कालावधीमध्ये श्री बाबीरच्या मंदिराच्या परिसरात व रुई गावामध्ये विविध कामे केली. श्री बाबीरच्या परिसराचा कायापालट केला आहे.

रुई गावातून बाबीरकडे जाणाऱ्या रस्त्याच्या प्रश्न मार्गी लावला असून, यासाठी एक कोटी 65 लाख रुपयांचा निधी दिला असून, रस्त्याचे काम अंतिम टप्यात आहे. तसेच मंदिराच्या परिसरामध्ये सुशोभीकरणाचे कामे पूर्ण झाली असून, श्री बाबीरच्या तीर्थक्षेत्राचा कायापालट झाला असल्याची माहिती माने यांनी दिली.

श्री बाबीर देवस्थानला ‘ब’ दर्जा मिळावा यासाठी प्रयत्न करणार 

सध्या बाबीर  देवस्थानचा ‘क ’ दर्जाच्यामध्ये समावेश आहे. माजी केंद्रीय मंत्री शरद पवार,खासदार सुप्रिया सुळे,माजी उपमुख्यमंत्री अजित पवार व आमदार दत्तात्रेय भरणे यांच्या माध्यमातून ‘ ब ’ दर्जा मिळावा यासाठी प्रयत्न करणार असून  ‘ ब ’ दर्जाच्या मिळाल्यास तीर्थक्षेत्र विकास आराखड्यामधून जास्तीजास्त निधी आणता येऊ शकेल असे माने यांनी सांगितले.