पुणे : भूमी अभिलेख विभागाने ‘ई-मोजणी -२’ नवीन प्रणाली आता वेल्ह्यासह बारामती आणि पुरंदर तालुक्यांतही सुरू केली आहे. लवकरच पुणे जिल्ह्यातही ती लागू करण्यात येणार आहे. भूमी अभिलेख विभागाने ई-मोजणी ही संगणक प्रणाली अद्ययावत करून ई-मोजणी २.0 ही नवीन प्रणाली आणली आहे.

यामध्ये जमीनधारकाला स्वत:च मोजणीसाठी आॅनलाइन अर्ज आणि मोजणी फी भरण्याची सुविधा आहे. यांसह मोजणी अर्जाबाबतची प्रगती अर्जदाराला एसएमएसद्वारे कळणार आहे. जमीन मोजणीच्या नकाशाची प्रतसुद्धा ऑनलाइन मिळत आहे. या प्रणालीचा वापर प्रायोगिक तत्त्वावर पुणे जिल्ह्यातील वेल्हा तालुक्यात करण्यात येत होता. आता पुरंदर आणि बारामती तालुक्यांत ई-मोजणी २.० चा वापर करून मोजणी होत आहे.

ई मोजणी २.० या संगणक प्रणालीद्वारे स्वीकारण्यात येणारे मोजणी अर्ज जीआयएस आधारित रोव्हर्स द्वारे मोजणी करण्यात येत आहेत. त्यामुळे मोजणी नकाशामध्ये प्रत्येक हद्दीचे अक्षांश व रेखांश प्राप्त होत आहेत.

टप्प्याटप्प्याने जिल्ह्यात प्रणालीचा वापर करणार

मागील एक वर्षांपूर्वी ई-मोजणी २-० या प्रणालीचा वापर करण्यास सुरुवात झाली. सुरुवातीस पुणे जिल्ह्यातील वेल्हा तालुक्याचा समावेश होता. आता यामध्ये पुरंदर आणि बारामती तालुक्यांचा समावेश केला आहे. त्यानंतर टप्प्याटप्प्याने उर्वरित तालुक्यांमध्येही प्रणालीचा वापर करण्यात येणार आहे.

ई-मोजणीची वैशिष्ट्ये

• ऑनलाइन जमीन मोजणीसाठी अर्ज करता येणार

• ऑनलाइन मोजणी फी भरण्याची सुविधा

• अर्जाची सद्यःस्थिती एसएमएसने कळणार

• जमीन मोजणी प्रत ऑनलाइन मिळणार

• मोजणीच्या नकाशावर ‘अक्षांश-रेखांक्ष’ असणार

• जमिनीचे लोकेशन सुद्धा कळणार