पुणे - पंतप्रधान नरेंद्र मोदी यांनी ‘मैं भी चौकीदार’ या कार्यक्रमाच्या माध्यमातून व्हिुडओ कॉन्फरन्सिंगद्वारे मुंबई, दिल्ली, बंगळुरू, उडीसा, अरुणाचल प्रदेश, ग्वाल्हेर येथील भाजप कार्यकर्त्यांशी संवाद साधला. पुण्याचा यामध्ये सहभाग नसला, तरी भाजप कार्यकर्त्यांनी टीव्हीवर लाइव्ह कार्यक्रम पाहिला. म्हात्रे पूल येथील शुभांकर लॉन्समध्ये भाजपने या कार्यक्रमासाठी खास स्क्रिनची सोय केली होती. शहरातील पदाधिकारी, तसेच कार्यकर्ते उपस्थित होते.

महायुतीचे उमेदवार पालकमंत्री गिरीश बापट म्हणाले, ‘‘चौकीदार म्हणजे हातात काठी घेऊन शिट्टी मारणारा नाही, तर महात्मा गांधी यांच्या कल्पनेतील देशाचा विश्‍वस्त आहे. सरकारने भरपूर कामे केली आहेत. विरोधकांवर टीका करण्यापेक्षा आम्ही केलेली कामे मतदारांपर्यंत पोचवणे हे आव्हान आहे. ’’ 

या वेळी लोकसभा प्रभारी योगेश सागर, शहराध्यक्ष योगेश गोगावले, अनिल शिरोळे, आमदार माधुरी मिसाळ, विजय काळे, मेधा कुलकर्णी, महापौर मुक्ता टिळक, उपमहापौर डॉ. सिद्धार्थ धेंडे, श्रीनाथ भिमाले, अशोक कांबळे, मुरली मोहोळ, उज्ज्वल केसकर, दीपक मिसाळ, प्रशांत बधे उपस्थित होते.

बापट, कुल उद्या अर्ज भरणार 
महायुतीचे पुण्यातील उमेदवार गिरीश बापट आणि बारामतीच्या उमेदवार कांचन कुल हे दोघे मंगळवारी (ता. २) उमेदवारी अर्ज दाखल करणार आहेत. बापट यांचा उमेदवारी अर्ज भरण्यापूर्वी कसबा गणपती येथे सभा होणार असून नंतर नरपतगिरी चौकापर्यंत रॅली काढली जाणार आहे.