पिंपरी - शहरात पावसाळ्यात वीज गायब होण्याचे प्रमाण वाढले असून, दर महिन्याला नऊ हजार तक्रारींची नोंद महावितरणकडे होत असल्याचे समोर आले आहे. गेल्या वर्षीच्या तुलनेत यामध्ये दहा टक्‍क्‍यांची वाढ झाली आहे.

वस्तुस्थिती काय?
उन्हाळ्यामध्ये शहरातील वीजवाहिन्यांच्या देखभाल व दुरुस्तीचे काम पूर्ण होणे अपेक्षित असते. मात्र, प्रत्यक्षात ते होत नाही. त्यामुळे पावसाळ्यात वीजपुरवठा खंडित होण्याच्या प्रकारात वाढ होते. बऱ्याचदा महापालिकेकडून रस्तेदुरुस्ती, भुयारी गटारे, जलवाहिन्या टाकण्याची कामे सुरू असताना भूमिगत केबल तुटतात. पावसाळ्यात त्यामध्ये पाणी जाऊन ‘शॉर्ट सर्किट’ होऊन वीजपुरवठा खंडित होतो. महावितरणकडून देखभाल व दुरुस्तीकडे पुरेशा प्रमाणात लक्ष देण्यात येत नसल्यामुळे वीज जाण्याच्या प्रमाणात वाढ होत आहे. पावसाळ्यात झाडांच्या फांद्या वीजवाहक तारांवर पडल्यानेही वीजपुरवठा खंडित होतो. 

स्वतंत्र पाइपलाइनचा प्रस्ताव...
विजेच्या केबलसाठी स्वतंत्र पाइपलाइन टाकण्याचा प्रस्ताव लाल फितीत अडकला आहे. काही दिवसांपूर्वी झालेल्या स्मार्ट सिटीच्या बैठकीत या विषयावर सविस्तर चर्चा करण्यात आली होती. मात्र, केबल टाकण्यासाठी
 येणारा खर्च मोठा असल्यामुळे हा विषय अद्याप मार्गी लागू शकलेला नाही.