पुणे - ‘नमामि देवी नर्मदे’च्या मंगल स्वरांमध्ये प्रदूषित झालेल्या मुठा नदीत नर्मदेचे जल अर्पण करीत पुणेकरांनी मुठेची महाआरती केली. याप्रसंगी मुठा पुनरुज्जीवन अभियानाच्या निमित्ताने मुठा नदी स्वच्छ ठेवण्यासाठी हातभार लावणार असल्याची शपथ पुणेकरांनी घेतली.

नर्मदा जयंतीनिमित्त निनाद पुणे, महापालिका, कलातीर्थ, ग्रंथ पारायण दिंडीतर्फे ‘आमची मुठा, आमची नर्मदा’ अंतर्गत मुठा पुनरुज्जीवन अभियान कार्यक्रमाचे आयोजन डेक्कन येथील भिडे पुलाशेजारील नदीपात्रात करण्यात आले होते. या वेळी फुलगाव येथील स्वामी स्वरूपानंद सरस्वती, भालोद येथील प्रतापे महाराज, नर्मदा परिक्रमावासीयांची सेवा करणाऱ्या ज्योतीबेन पंड्या, हिरालाल रावत, निनादचे अध्यक्ष उदय जोशी, वीरेंद्र कुंटे, अमोल काळे, सुनील केसरी आदी उपस्थित होते.

स्वामी स्वरुपानंद सरस्वती म्हणाले, ‘‘आपण आपल्या घराची न सांगता स्वच्छता करतो, तशीच सेवा शहराची आणि मुठा नदीची करूयात.’’ 

नर्मदेच्या परिक्रमेतून मनुष्याच्या आतील राक्षस नष्ट होतो. सध्या माणसातील मनुष्य जिवंत होण्याची गरज असल्याचेही त्यांनी सांगितले. नर्मदा ही फक्त नदी नाही, तर ती एक संस्कृती आहे. नर्मदेच्या परिक्रमामार्गावरील ग्रामस्थ नर्मदेची माता समजून सेवा करतात, असे पंड्या यांनी सांगितले.

या वेळी जोशी म्हणाले, की सध्या मुळा-मुठा नदी पूर्णपणे मृत, सत्वहिन व विषमय झाली आहे. तिला पूर्वीप्रमाणे स्वच्छ, निर्मळ करण्याचा मनोदय करीत नर्मदाजल मुळा-मुठा नदीत वाहते करून मुठा-पुनरुज्जीवन अभियान राबविण्यात आले. 

यानिमित्ताने नर्मदा आणि मुठा नदीच्या उगम स्थानावरील पाण्याची ‘जलकलश’ मिरवणूक काढण्यात आली. यामध्ये रेणुका स्वरूप मेमोरिअल गर्ल्स हायस्कूल आणि पेरूगेट भावे हायस्कूल येथील मुलांनी मिरवणुकीत सहभाग घेतला.