पुणे : महापालिकेच्या तिजोरीत ५ मार्चअखेर मिळकत करापोटी १४३८ कोटी ९३ लाखांची रक्कम जमा झाली आहे. त्यातील सुमारे ५० टक्के रक्कम ऑनलाइन पद्धतीने जमा झाली आहे. तसेच नागरिकांच्या सोयीसाठी ३१ मार्चपर्यंत सुटीच्या दिवशीही कर भरणा कार्यालये सुरू राहणार असल्याचे महापालिकेने कळविले आहे.

ताज्या बातम्यांसाठी डाऊनलोड करा ई-सकाळचे ऍप

पिंपरी-चिंचवडच्या बातम्या वाचण्यासाठी येथे ► क्लिक करा

मिळकत कराचा भरणा न करणाऱ्या ४३७ मिळकतींवर जप्तीची कारवाई महापालिकेने केली आहे. त्यातील ११६ मिळकतदारांनी १३ कोटी ६८ लाख २८ हजार ३७३ रुपयांची थकबाकी भरल्यामुळे त्यातील ११६ मिळकती सीलमुक्त करण्यात आल्या आहेत, अशी माहिती सहमहापालिका आयुक्त आणि मिळकत कर विभागाचे प्रमुख विलास कानडे यांनी दिली. तसेच ७ कोटी ७२ लाखांची थकबाकी न भरल्यामुळे ९ मालमत्तांचा लिलाव करण्यास महापालिका आयुक्तांनी परवानगी दिली आहे.

पुण्याच्या बातम्या वाचण्यासाठी येथे ► क्लिक करा

५ लाख ३७ हजार ९११ नागरिकांनी ७७५ कोटी ६५ लाखांचा मिळकत कर ऑनलाइन पद्धतीने भरला आहे. तर, १ लाख २६ हजार ५९२ नागरिकांनी १६६ कोटी ३० लाख रुपये रोख रकमेद्वारे भरला आहे. तर, १ लाख ०१ हजार १४ नागरिकांनी धनादेशाद्वारे ४९६ कोटी ६७ लाख रुपयांचा मिळकत कर भरला आहे, असेही कानडे यांनी सांगितले. मिळकत कर भरण्यासाठी शहरातील सर्व नागरी सुविधा केंद्रे सोमवार ते शनिवारी सकाळी दहा ते दुपारी चार दरम्यान सुरू राहणार असून रविवारी सकाळी दहा ते दुपारी दोन वाजेपर्यंत सुरू राहणार असल्याचे महापालिकेने स्‍पष्ट केले आहे.