पुणे - इंधन दरवाढीचा कोणताही बोजा प्रवाशांवर टाकणार नाही. त्यामुळे पीएमपी प्रवासाच्या भाडेवाढीचा प्रश्‍नच उद्‌भवत नाही, असे भारतीय जनता पक्षाने स्पष्ट केले आहे. तसेच प्रशासनाच्या दरवाढीच्या प्रस्तावाला विरोध करणार असल्याचेही पक्षाने स्पष्ट केले आहे. 

पीएमपीच्या प्रवासी भाड्यात वाढ करण्यासाठी प्रस्ताव तयार करण्यास पीएमपी प्रशासनाने तयारी सुरू केली आहे. पहिले दोन टप्पे वगळता उर्वरित टप्प्यांसाठी दरवाढ लागू होईल, असे पीएमपीने नुकतेच म्हटले आहे. संचालक मंडळाच्या बैठकीत दरवाढीचा प्रस्ताव मंजुरीसाठी सादर करू, असे त्यांनी म्हटले आहे.

मात्र, पीएमपीच्या प्रवासी भाडेवाढीला भारतीय जनता पक्षाचा विरोध असेल, असे शहराध्यक्ष योगेश गोगावले यांनी म्हटले आहे. तर संचालक मंडळाच्या बैठकीत प्रशासनाच्या प्रस्तावाला विरोध केला जाईल, असे संचालक सिद्धार्थ शिरोले यांनी म्हटले आहे. उत्पन्नाचे पर्यायी स्त्रोत निर्माण करून पीएमपीवर वाढलेला बोजा कमी करू, असेही गोगावले यांनी स्पष्ट केले आहे.