पुणे - शरद मोहोळ खून प्रकरणी गुंड विठ्ठल शेलार याच्यासह १७ जणांविरुद्ध महाराष्ट्र संघटित गुन्हेगारी नियंत्रण कायद्यान्वये (मोका) कारवाई करण्यात आली. याबाबत पोलिस आयुक्त रितेश कुमार यांनी आदेश दिले. या प्रकरणी गुन्हे शाखेने १५ आरोपींना अटक केली असून, अन्य दोघेजण अद्याप फरार आहेत.

कोथरूड येथील सुतारदरा परिसरात आरोपी मुन्ना पोळेकर आणि त्याच्या दोन साथीदारांनी शरद मोहोळवर पिस्तुलातून गोळ्या झाडून खून केला होता. पाच जानेवारी रोजी दुपारी दीड वाजण्याच्या सुमारास हा प्रकार घडला होता. याबाबत कोथरूड पोलिस ठाण्यात टोळीप्रमुख विठ्ठल शेलारसह १७ जणांविरुद्ध गुन्हा दाखल केला आहे.

साहिल ऊर्फ मुन्ना संतोष पोळेकर (वय २०), नामदेव महिपती कानगुडे (वय ३४), विठ्ठल किसन गांडले (वय २०, तिघेजण रा. सुतारदरा, कोथरूड), अमित मारुती कानगुडे (वय २४, रा. पर्वती), चंद्रकांत शाहु शेळके (वय २२, रा. जनता वसाहत, पर्वती), विनायक संतोष गव्हाणकर (वय २०, रा. पौड रस्ता, मुळशी), रवींद्र वसंतराव पवार (वय ४०, रा. नांदे गाव, ता. मुळशी), संजय रामभाऊ उढाण (वय ४३, रा. उजवी भुसारी कॉलनी, कोथरूड), सतीश संजय शेडगे (वय २८, रा. भूगाव, ता. मुळशी), धनंजय मारुती वाटकर (वय २५, रा. सैदापूर, कराड), नितीन अनंता खैरे (वय ३४, रा. गादिया इस्टेट, कोथरूड), आदित्य विजय गोळे (वय २४, रा. पिरंगुट, ता. मुळशी), संतोष दामोदर कुरपे (वय ४९, रा. परमहंस नगर, कोथरूड), रामदास ऊर्फ वाघ्या नानासाहेब मारणे (वय ३६, रा. आंबेगाव, उरवडे, ता. मुळशी), विठ्ठल महादेव शेलार (वय ३६, रा. बोथरवाडी, उरवडे, ता. मुळशी), प्रीतसिंग (रा. उमरठी, मध्यप्रदेश) आणि गणेश मारणे (रा. कर्वेनगर) अशी मोका दाखल झालेल्या आरोपींची नावे आहेत. शेलार याच्याविरुद्ध गंभीर स्वरूपाचे २१ गुन्हे दाखल आहेत. आरोपी गणेश मारणे आणि प्रीतसिंग अद्याप फरार आहेत.

या टोळीविरुद्ध गुन्हे-१ शाखेचे सहायक पोलिस आयुक्त सुनील तांबे यांनी पोलिस उपायुक्त अमोल झेंडे यांच्यामार्फत अतिरिक्त आयुक्त रामनाथ पोकळे यांच्याकडे ‘मोका’चा प्रस्ताव सादर केला होता. या प्रकरणाची छाननी करून पोकळे यांनी प्रस्तावास मान्यता दिली.

गुन्हे शाखेचे पोलिस निरीक्षक विनायक गायकवाड, सहायक निरीक्षक विवेक पाडवी, पोलिस उपनिरीक्षक राहुल पवार, पोलिस अंमलदार सुनील राऊत, शरद वाकसे, नितीन कांबळे, नितीन काळे, गणेश ढगे यांच्या पथकाने ही कारवाई केली. पुढील तपास सहायक आयुक्त तांबे करीत आहेत.