आळंदी येथील बंधाऱ्याच्या नादुरुस्त ढाप्यांमुळे हजारो लिटर पाण्याची गळती
आळंदी - शहराला पाणीपुरवठा करणाऱ्या इंद्रायणीवरील सिद्धबेट येथील बंधाऱ्यात जलसाठा कमी झाल्याने दिवसाआड पाणीपुरवठा केला जात आहे, असा संदेश काही नगरसेवकांनी सोशल मीडियाद्वारे नागरिकांना पाठविला. मात्र, बंधाऱ्यात पाणीसाठा चांगला असून, नादुरुस्त ढाप्यांमुळे गळती होत आहे. पाणी वाया जात आहे. बंधाऱ्यात पाणी असूनही दिवसाआड पाणी का, असा सवाल विचारला जात आहे.

आळंदीत आजपासून दिवसाआड पाणीपुरवठा करण्यास सुरवात झाली. गावठाणात खेड हद्दीत सकाळपासून पाणी वितरित झाले. त्यामुळे उद्या गावठाणात पाणी नसेल. देहूफाटा, काळेवाडी, इंद्रायणीनगर या नदीपलीकडील भागात उद्या पाणीपुरवठा केला जाणार आहे. मात्र, गेल्या दोन दिवसांपासून काही नगरसेवक दिवसाआड पाणीपुरवठ्याचे कारण सांगताना सिद्धबेटमधील बंधाऱ्यात पाणीसाठा कमी झाल्याचे सांगत आहेत.

तसे संदेश सोशल मीडियाद्वारे नागरिकांना पाठविले जात आहेत. वस्तुतः इंद्रायणी नदीवरील या बंधाऱ्यात सध्या तरी बऱ्यापैकी पाणी आहे. या बंधाऱ्याचे ढापे चांगले नसल्याने हजारो लिटर पाणी गळतीद्वारे वाया जात आहे. गळतीद्वारे वाया जाणारे पाणी नगरपालिका का रोखू शकली नाही, असा प्रश्न विचारला जात आहे. पिंपरी-चिंचवड महापालिका हद्दीतून येणारे लाखो लिटर सांडपाणी याच बंधाऱ्यात अडविले जाते आणि हेच सांडपाणी शुद्धीकरण केल्यानंतर शहरात वापरासाठी वितरित केले जात आहे. यामुळे दिवसाआड पाणीपुरवठ्यासाठी पालिका पदाधिकाऱ्यांकडून दिले जाणारे कमी पाणीसाठ्याचे कारण नागरिकांना तकलादू वाटत आहे.

जलपर्णी रोखण्यात अपयश
केळगाव ते सिद्धबेट येथील इंद्रायणीतील बंधाऱ्यात सध्या बेसुमार जलपर्णी वाढली. बंधाऱ्याच्या खाली गरुडस्तंभापर्यंत जलपर्णी केवळ वाढलीच नाही, तर बहुतांश ठिकाणी वाळून गेली आहे. जलपर्णी रोखण्यासाठी लावलेले प्लॅस्टिकचे बॅरेल पालिकेच्या दुर्लक्षामुळे अस्ताव्यस्त झाले आहेत. बॅरेलचा खर्च वाया गेला असून, जलपर्णी रोखण्यात नगरपालिका अपयशी ठरली आहे. याशिवाय, पालिकेने जलपर्णी काढण्यासाठी वार्षिक ठेका दिला. मात्र, कार्तिकी यात्रेनंतर यावर कामच झाले नसल्याने प्रदूषणात भर पडल्याचे चित्र आहे.