ती चिमुकली नाव बघणाऱ्याला कळतच नाही की, ही खडूतून कोरलेली आहे. पाटीवर लिहायच्या पेन्सिलीवरचा तो खांबावर चढणारा माणूस पाहून नवल वाटतं. पंख पसरलेले रंगीत पक्षी दाखवत ते सांगतात, ‘हे तर रद्दी कागदापासून बनवले,’ तेव्हा थक्क व्हायला होतं. अजय कुकनूर यांनी घडवलेल्या चित्तवेधक कलाकृती कशापासून बनवल्या आहेत, हे पाहणाऱ्यांना चटकन लक्षात येत नाही, हे त्यांचं अनोखेपण आहे.

ताज्या बातम्यांसाठी डाऊनलोड करा ई-सकाळचे ऍप

नखाएवढी पांढरी तोफ अजय कुकनूर यांनी केली आहे. ही अजब चीज त्यांनी फळ्यावर लिहायच्या खडूमध्ये कोरली आहे. तशीच एक सुबक नावही आहे. खडूतून कोरलेला हात पाहून लहान मुलांना मौज वाटते. कुकनूर म्हणाले, ‘‘मी लहान असताना आईने पोळ्या करण्यासाठी भिजवलेल्या कणकेचा छोटा गोळा मागून घ्यायचो. त्याला आकार देत पक्षी किंवा प्राणी बनवायचो.

माझ्या वडिलांना त्याचं कौतुक वाटायचं. एकदा त्यांनी मला प्लॅस्टिक क्‍ले आणून दिली. ती सुकत नसायची. त्या गोळ्याला वेगवेगळे आकार देत बसायचो. जे केलं असेल ते नंतर मोडून नवं काही सुचेल ते घडवायचो.

बालपणीची ही आवड मोठेपणी खडू, पाटीवर लिहायची पेन्सिल, रद्दी कागद यांसारख्या माध्यमांतून काही करून पाहण्यात विस्तार पावली. माझे वडील लाकूड कोरून काही ना काही बनवत असायचे. ते पाहून मीही आतापर्यंत अनेक लाकडी चमचे तयार केले आहेत. लाकडी की चेन्सबरोबरच मी छोट्या-छोट्या क्रिकेट बॅट व टेनिस रॅकेटसुद्धा तयार केल्या. धान्य पाडण्यासाठी लागणारं भातुकलीतलं अंगठ्याएवढं सूपही बनवलं आहे.’’

कुकनूर यांनी असंही सांगितलं की, एकदा सहज रद्दी कागद गुंडाळताना त्यात बदकांचा आकार जाणवला. थोडी आणखी मेहनत घेऊन बदक तयार केलं. ते रंगवल्यावर छान दिसू लागलं. मग फ्लेमिंगो, पेंटेड स्टॉर्क वगैरे पक्षी बनवले. पंख पसरलेल्या अवस्थेत ते असल्याने उडत असल्याचा भास होतो. कागदाचे लहान-मोठे बाउल बनवले आहेत. त्यांत फुलं ठेवल्यावर त्यांचं रूप आणखी वेगळं दिसतं. दिवाळीत अंगणात, बाल्कनीत आकाशकंदील लावतात तसे आपण घरात लावायला करूया, असं मनात आलं. वेगवेगळ्या आकारांमधले हे लॅम्प शेड आम्ही घरात लावत असतो. लॅम्प शेड आणि पक्षी अलीकडेच करू लागलो, पण चित्रं बालपणापासून काढत आलो आहे. रेखाचित्रं काढायला विशेष आवडतात.