आंधळगाव, ता. १८ : मांडवगण फराटा (ता. शिरूर) येथे तीन वेगवेगळ्या घटनांत सोन्याचे दागिने, रोख रक्कम व दुचाकी, असा पावणेदोन लाखांचा ऐवज लांबवल्याचा प्रकार गुरुवारी (ता. १८) सकाळी सहा वाजता उघडकीस आला.
याप्रकरणी प्रभाकर रंगनाथ घाडगे (रा. मांडवगण फराटा- घाडगे तळई) यांनी मांडवगण फराटा पोलिस दूरक्षेत्रात फिर्याद दिली. त्यानुसार अज्ञात चोरट्यांच्या विरोधात गुन्हा दाखल केला आहे. पहिल्या घटनेत घाडगे तळई येथील प्रभाकर घाडगे हे आपल्या घरी कुटुंबासह नेहमीप्रमाणे रात्री झोपले होते. बुधवारी रात्री अकरा ते गुरुवारी पहाटे साडेपाच यावेळेत चोरट्याने घराच्या कुलुपाचा कडी- कोयंडा तोडून घरात प्रवेश केला व स्वयंपाक घरातील कपाटातील १० ग्रॅम वजनाचे सोन्याचे झुबे, चार तोळे वजनाचा राणी हार, तीन ग्रॅम वजनाचे सोन्याचे मनी मंगळसूत्र, असा दोन लाख पासष्ट हजारांचा ऐवज चोरून नेला. गुरुवारी सकाळी उठल्यानंतर चोरी झाल्याचा प्रकार घाडगे यांच्या लक्षात आला. चोरटे चोरी करण्यासाठी ज्या दुचाकीने आले होते, ती चोरीची दुचाकी घाडगे यांच्या घराशेजारील शेतात सोडून ते पळून गेले.
दुसऱ्या घटनेत घाडगे तळई येथील रेखा शांताराम लोले या महिलेच्या घरातून रोख अठरा हजारांची रोकड चोरट्यांनी लांबवली. तिसऱ्या घटनेत दगडवाडी येथील वैभव चंद्रकांत फराटे यांच्या घरासमोर लावलेली बजाज कंपनीची दुचाकी (क्र. एम.एच. १२ जी.जी. ३८७६) चोरून नेली.
याबाबतचा पुढील तपास शिरूरचे पोलिस निरीक्षक जोतीराम गुंजवटे यांच्या मार्गदर्शनाखाली पोलिस उपनिरीक्षक पाटील करत आहेत.