आळंदी, ता. २ : पन्नास हजारांचे लोखंडी पिस्तूल आणि कोयता बाळगल्याप्रकरणी आळंदीत गुंडाविरोधी पथकाने तिघांना कोयता गँगच्या गुंडांना अटक केली. चार दिवसांपूर्वी पोलिसांनी अन्य तिघांना अटक करून चार पिस्तूल जप्त केले होते. यामुळे आळंदी परिसरात गुन्हेगार पुन्हा सक्रिय झाल्याचे चित्र आहे.

सिद्धेश सीताराम गोवेकर (रा. चऱ्होली, ता. खेड), ज्ञानेश्वर बाळासाहेब पारवे (रा. गोपाळपुरा, आळंदी), यश शिवाजी भोसले (रा. दत्त मंदिर, आळंदी) या तिघांना अटक केली. यामध्ये एका अल्पवयीन मुलाला गुन्हे करण्यास प्रवृत्त करून टोळी तयार करत असल्याची माहिती आळंदी पोलिसांनी दिली. याबाबत गुंडाविरोधी पथकातील मयूर दळवी यांनी फिर्याद दिली आहे.

गस्त घालत असताना गुंडाविरोधी पथकाला खबऱ्यां‍कडून माहिती मिळाली, की गोवेकर हा दोन मित्रांसह केळगाव चौकात संशयास्पद हालचाली करीत आहे. पोलिस गोवेकरच्या दिशेने जात असताना त्या ठिकाणहून लगबगीने पळून जाताना तिघांना पोलिसांनी ताब्यात घेतले. तिघांची अंगझडती घेतली असता त्यांच्याकडे पन्नास हजार रुपयांचे लोखंडी पिस्तूल आणि हजार रुपयांची दोन काडतुसे मिळाली. भोसलेकडे कोयता मिळाला, तर गुन्ह्यासाठी वापरण्यात आलेली काळ्या रंगाची बुलेट ताब्यात घेतली.