बारामती, ता. २७ : शहरातील खंडोबानगर चौकात हायवा ट्रकने दुचाकीला जोरदार धडक दिली. यामुळे झालेल्या अपघातात दुचाकीवरील वडील व दोन मुलींचा मृत्यू झाला. ही घटना रविवारी (ता.२७) दुपारी बाराच्या सुमारास घडल्याची माहिती पोलिस निरिक्षक विलास नाळे यांनी दिली.

ओंकार राजेंद्र आचार्य हे खंडोबानगरच्या चौकात दुचाकीवरून आपल्या दोन मुलींसह (क्र. एमएच ४२- बी- ४८४४) निघाले होते. त्यावेळी हायवा ट्रकची (क्रमांक एमएच १६- सीए-०२१२) त्यांच्या दुचाकीला धडक बसली. यात हायवाच्या मागच्या चाकाखाली आल्याने त्यांचा मृत्यू झाला. तर त्यांची मुलगी सई ओंकार आचार्य (वय १०) व मधुरा ओंकार आचार्य (वय ४) यांचा दवाखान्यात नेताना मृत्यू झाल्याचे पोलिसांनी सांगितले.
अपघाताचे नेमके कारण पोलिस तपासत असून, या हायवा चालकास पोलिसांनी ताब्यात घेतले आहे. शहरातील खंडोबानगर चौकात भरदुपारी हा अपघात झाल्यानंतर तेथे मोठी गर्दी झाली होती. पोलिसांनी तातडीने घटनास्थळी धाव घेत मृतदेह उत्तरीय तपासणीसाठी सिल्व्हर ज्युबिली रुग्णालयात पाठविले.
अपघाताच्या ठिकाणचे दृश्य हृदयद्रावक होते. एकाच वेळेस वडील व दोन्ही छोट्या मुलींचा दुर्दैवी मृत्यू अनेकांना चटका लावून गेला. दरम्यान, ओंकार आचार्य यांच्या पश्चात पत्नी अरुणा, वडील सेवानिवृत्त जिल्हा परिषद प्राथमिक शाळा शिक्षक राजेंद्र श्रीनिवास आचार्य, सेवानिवृत्त प्राथमिक शिक्षिका आई शैलेजा राजेंद्र आचार्य, अमोल राजेंद्र आचार्य हे कुटुंबीय आहेत.

शहरातील अवजड वाहनांची वाहतूक जीवघेणी
बारामती शहरातून होणारी अवजड वाहनांची वाहतूक जीवघेणी ठरत आहे. या पार्श्वभूमीवर आता तरी अवजड वाहनांची वाहतूक शहराबाहेरून वळविण्यासाठी प्रशासनाने उपाययोजना कराव्यात, अशी बारामतीकरांची मागणी आहे.