चाकण, ता. २८ : येथील चाकण- शिक्रापूर मार्गावर माणिक चौकाजवळ चोरलेले सोन्याचे दागिने दुकानदाराकडे मोडण्यासाठी फिरत असणाऱ्या दोघा संशयित सोनसाखळी चोरांना पोलिसांनी ताब्यात घेऊन त्यांच्याकडून एक दुचाकी, साडेपाच तोळ्यावरील वजनाची सोन्याची चेन जप्त केली. सुमारे तीन लाख दहा हजार रुपये किमतीचा मुद्देमाल पोलिसांनी जप्त केला.
याबाबत चाकण पोलिस ठाण्याचे वरिष्ठ पोलिस निरीक्षक संजय सोळंके, सहाय्यक पोलिस निरीक्षक प्रसन्न जऱ्हाड यांनी माहिती दिली की, शुक्रवारी (ता. २५) चाकण पोलिस ठाण्याच्या गुन्हे शोध पथकातील सहाय्यक पोलिस निरीक्षक प्रसन्न जऱ्हाड, पोलिस हवालदार कांबळे, पोलिस शिपाई सूर्यवंशी, लोखंडे, भागवत यांच्या पथकाने माणिक चौकाजवळ दुचाकीवरील (क्र. एमएच १२ क्यूझेड ९१४) आरोपी मयूर दत्तात्रेय जाधव (वय ३०, रा. करंजविहिरे, ता. खेड), आकाश बाळू कडू (वय ३०, रा. अहिरे गाव, वांजळेवाडी, ता. हवेली) यांना संशयितरीत्या फिरून दागिने मोडण्याच्या तयारीत असताना ताब्यात घेतले. चौकशी करून दोघा आरोपींनी घोडेगाव येथील पोलिस ठाण्याच्या हद्दीत सोनसाखळीचोरीचा गुन्हा केलेला आहे व तो पोलिस ठाण्यात दाखल आहे. या आरोपीकडून त्या गुन्ह्यातील चोरी केलेली सोन्याची साडेपाच तोळे वजनाची सोन्याची चेन व गुन्ह्यात वापरलेली दुचाकी, असा सुमारे तीन लाख दहा हजार रुपये किमतीचा मुद्देमाल जप्त केला.