इंदापूर, ता. ७ : इंदापूर तालुक्यातील गलांडवाडी येथे पोल्ट्री फार्ममधील लंगड्या कोंबड्या न घेतल्याच्या रागातून पोल्ट्री फार्मवरील कामगारांनी केलेल्या मारहाणीत वाहन चालकाचा मृत्यू झाला. रियाज चुन्नुमीया जहागीरदार (वय ५२, रा. सय्यदनगर, नूर मशिदीजवळ, हडपसर) असे मृत्यू झालेल्या चालकाचे नाव असून, याप्रकरणी इंदापूर पोलिस ठाण्यात चार जणांच्या विरोधात गुन्हा दाखल केला आहे.
याबाबत आसिफ युनूस शेख (रा. सय्यदनगर, नूर मशिदीजवळ, हडपसर) यांनी दिलेल्या फिर्यादीनुसार, गलांडवाडी नं. १ येथील विशाल सूर्यवंशी पोल्ट्री फार्मवर फिर्यादीचे दाजी रियाज चुन्नुमीया जहागीरदार हे कोंबड्या गाडीत भरून घेऊन जाण्यासाठी आले होते. त्या ठिकाणी कोंबड्या भरत असताना पोल्ट्री फार्मवरील कामगारांना, ‘लंगड्या कोंबड्या गाडीत भरण्यासाठी आणू नका. त्या कंपनीमध्ये घेतल्या जात नाहीत,’ असे रियाज जहागीरदार म्हणाले. त्यामुळे कामगार निखिल जाधव, विकी नलावडे, लहू शिंदे (रा. गलांडवाडी नं. १) व विशाल कांबळे (रा. शिरसोडी, ता. इंदापूर) यांनी रियाज यांना हाताने तोंडावर व डोक्यामध्ये बेदम मारहाण करून शिवीगाळ केली. या मारहाणीमध्ये रियाज यांच्या डोक्याला गंभीर दुखापत झाल्याने ते जागेवरती बेशुद्ध पडले. त्यांना तत्काळ बारामती येथे उपचारासाठी नेले व तेथून ससून हॉस्पिटल येथे उपचारासाठी नेत असताना त्यांचा मृत्यू झाला. तीन आरोपींना इंदापूर पोलिसांनी अटक केली आहे. पुढील तपास पोलिस निरीक्षक सूर्यकांत कोकणे करीत आहेत.