सणसवाडी, ता. १३ ः येथील एका व्यवसायामध्ये गुंतवलेले भागीदारीचे पैसे आणि कामाच्या मोबदल्याची रक्कम मागितल्याने एका युवकाला तिघांनी बेदम मारहाण केली. या घटनेच्या दाखल फिर्यादीवरून ऋषिकेश धुमाळ व राजू चव्हाण यांच्यासह एका अनोळखी युवकावर गुन्हा दाखल करण्यात आल्याची माहिती शिक्रापूर पोलिसांनी दिली.
याबाबत शिक्रापूर पोलिसांनी दिलेल्या माहितीनुसार सणसवाडी (ता. शिरूर) येथील युनिटेक इंडस्ट्रीज नावाने सुरू केलेल्या कंपनीमध्ये ऋषिकेश धुमाळ व राजू चव्हाण यांच्यासह सुरेश चव्हाण यांनी एकत्रित आर्थिक गुंतवणूक करून दुकान सुरू केले होते. हे दुकान काही दिवस सुरू झाल्यानंतर यातील भागिदारांमध्ये भांडणे सुरू झाल्याने यातील फिर्यादी सुरेश चव्हाण याने धुमाळ व चव्हाण यांच्याकडे व्यवसायात गुंतवलेले ४० हजार रुपये आणि केलेल्या कामाचा मोबदला असे एकत्रित मागितले. यावर ऋषिकेश व राजू यांच्यासह त्यांच्या एका साथीदाराने सुरेशला शिवीगाळ केली. तसेच, दमदाटी करून त्याला बेदम मारहाण करीत जखमी केले. याबाबत सुरेश दशरथ चव्हाण (वय २९, सध्या रा. सणसवाडी, ता. शिरूर, मूळ रा. मांडवगण फराटा, ता. शिरूर) यांनी शिक्रापूर पोलिस ठाण्यात फिर्याद दिल्याने पोलिसांनी ऋषिकेश धुमाळ (रा. पिंपळे खालसा, ता. शिरूर) व राजू चव्हाण (रा. सणसवाडी, ता. शिरूर) यांच्यासह एका अनोळखी युवकावर गुन्हा दाखल केला. या प्रकरणी अद्याप कुणालाही अटक केलेली नसून, पुढील तपास पोलिस हवालदार राकेश मळेकर करीत आहेत.