काटेवाडी, ता. ७ : ढेकळवाडी (ता. बारामती) येथील अनिकेत दत्तात्रेय सुळ याने सनदी लेखापाल (सीए) परीक्षेत यश मिळवत गावाचा लौकिक वाढवला आहे. त्याच्या या यशाबद्दल गावकऱ्यांनी त्याचा सत्कार करत कौतुकाचा वर्षाव केला.
अनिकेत याचे वडील दत्तात्रेय सुळ हे श्री छत्रपती सहकारी साखर कारखान्यात कामगार म्हणून कार्यरत आहेत. घरची आर्थिक परिस्थिती बेताची असतानाही अनिकेत याने जिद्द आणि मेहनतीच्या जोरावर हे यश मिळवले. त्याचे प्राथमिक शिक्षण ढेकळवाडी येथील जिल्हा परिषद शाळेत, तर माध्यमिक शिक्षण श्री छत्रपती हायस्कूल, भवानीनगर आणि बारामती येथील विद्या प्रतिष्ठानच्या वाणिज्य शाखेत झाले. बारावीनंतर त्याने उच्च शिक्षणासाठी पुणे गाठले. गेल्या पाच वर्षांपासून तो पुण्यात खासगी क्लासेसच्या माध्यमातून सनदी लेखापाल पदासाठी तयारी करत होता. ६ जुलै २०२५ रोजी जाहीर झालेल्या सनदी लेखापाल परीक्षेच्या निकालात त्याची निवड झाल्याचे समजताच कुटुंबीयांचा आनंद गगनात मावेनासा झाला. अनिकेत याचे वडील दत्तात्रेय सुळ यांची मुलांनी शिक्षण घेऊन स्वतःच्या पायावर उभे राहावे, अशी भावना होती. घरची शेती नसल्याने त्यांनी अनिकेत याच्या शिक्षणाला नेहमीच प्रोत्साहन दिले. अनिकेत हा कुटुंबातील पहिला सदस्य आहे, ज्याने उच्च शिक्षण पूर्ण करत असे मोठे यश मिळवले आहे. त्याचा मोठा भाऊही छत्रपती साखर कारखान्यात कामगार आहे, तर लहान भाऊ जळोची येथे आडत दुकान चालवतो. अनिकेत याच्या यशाबद्दल ढेकळवाडी ग्रामस्थांनी त्याचा सत्कार केला. तसेच, त्याच्या या यशाबद्दल कौतुक केले.