शिरूर, ता.२६ : शिरूर-मलठण रस्त्यावरील आमदाबाद फाटा येथे शुक्रवारी (ता.२५) रात्री पोलिसांनी गांजाची बेकायदेशीर वाहतूक करत असलेल्या दोन तरुणांना रंगेहाथ पकडले. विजय बबन काळे (वय २९) आणि शुभम शंकर मोहिते (वय २५, दोघे रा.टाकळी हाजी, ता.शिरूर) अशी अटक केलेल्यांची नावे आहेत.
आमदाबाद फाटा येथे शुक्रवारी रात्री सव्वा आठच्या सुमारास मळगंगा मंगल कार्यालयाजवळ पोलिसांनी सापळा रचून ही कारवाई केली. त्यांच्या ताब्यातून चार किलो गांजा आणि दुचाकी (एम एच‌१६ ई ८८९०) असा एकूण ऐंशी हजार रुपयांचा मुद्देमाल जप्त करण्यात आला आहे. या प्रकरणी पोलिस हवालदार तुषार पंदारे यांनी दिलेल्या फिर्यादीवरून शिरूर पोलिस ठाण्यात गुन्हा दाखल करण्यात आला. ही कारवाई पोलिस निरीक्षक संदेश केंजळे यांच्या मार्गदर्शनाखाली पोलिस उपनिरीक्षक दिलीप पवार यांच्या पथकाने केली.