कृषी विभागाकडून युरियाचा ७, ५०० तर डीएपीचा १ हजार टन साठा राखीव

पुणे, ता. २४ : खरीप हंगामाच्या तोंडावर शेतकऱ्यांना खते वेळेवर आणि पुरेशा प्रमाणात मिळावीत, यासाठी प्रशासनाकडून युरिया आणि डीएपी या अत्यावश्यक रासायनिक खतांचा संरक्षित (बफर) साठा तयार ठेवण्याचा निर्णय घेतला आहे. युरियाचा सात हजार ५०० टन आणि डीएपीचा एक हजार टन साठा राखीव ठेवण्यात येणार असून, यामुळे हंगामात अचानक निर्माण होणाऱ्या टंचाईला तोंड देणे शक्य होईल तर डीएपी खता ऐवजी पर्यायी खताचा वापर करण्यासाठी शेतकऱ्यांनी पुढाकार घ्यावा, असेही कृषी विभागाकडून सांगितले आले.

खरीप हंगामासाठी तयारी कृषी विभागाकडून करण्यात आली असून, यंदाच्या हंगामात पेरण्या वेळेत होणार असल्याची शक्यता लक्षात घेता कृषी विभागाने बियाणे व रासायनिक खतांचा पुरवठा सुरळीत राहील यासाठी नियोजन केले आहे. जिल्ह्यात खरीप हंगामात जवळपास दोन लाख हेक्टर क्षेत्रावर विविध पिकांची लागवड होते. यामध्ये प्रामुख्याने भात, सोयाबीन, बाजरी, मका, नाचणी, भुईमूग, मूग, तूर आणि उडीद यांचा समावेश आहे. मागील तीन हंगामात बियाण्यांची सरासरी ३४ हजार क्विंटल विक्री झाली होती.

दृष्टिक्षेपात
१. चांगल्या पावसाच्या अपेक्षेनुसार सुमारे ४८ हजार क्विंटल बियाण्यांचा पुरवठा
२. शेतकऱ्यांना वेळेवर व पुरेसे बियाणे सहज होणार उपलब्ध होणार
३. मॉन्सून वेळेवर आणि समाधानकारक असल्यास जिल्ह्यात उत्पादनात वाढ होण्याची शक्यता
४. प्रशासनाकडून वेळोवेळी आवश्यक मार्गदर्शन
५. कृषी विभागाचा पीक सल्ला केंद्रांद्वारे शेतकऱ्यांशी संवाद वाढवण्यावर भर

एक लाख ९६ टन खतसाठा मंजूर
रासायनिक खतांच्या बाबतीतही यंदा पुरेसा साठा उपलब्ध असून एकूण एक लाख ९६ हजार मेट्रिक टन रासायनिक खतसाठा मंजूर करण्यात आला आहे. यामध्ये युरिया, डीएपी, एमओपी, एनपीके अशा विविध प्रकारच्या खतांचा समावेश आहे. शेतकऱ्यांना पीक लागवडीच्या काळात कोणतीही अडचण निर्माण होऊ नये संरक्षित साठा ठेवला जाणार आहे.

यंदा मे महिन्यात पाऊस जास्त झाला असला तरी पेरण्यांसाठी उघडीप मिळेल असे वाटते. जर पाऊस थांबला आणि तर मशागत करून पुढील महिन्यात पेरण्या करता येतील. त्यासाठी बियाणे आणि खतांची तयारी सुरू केली आहे. मागील वर्षी शेवटच्या क्षणी खतासाठी रांगा लावाव्या लागल्या, पण यंदा प्रशासनाकडून संरक्षित साठा केला असल्यास त्याचा गरजू शेतकऱ्यांना लाभ मिळावा.
- जिजाराम इंगळे, शिरूर

डीएपी खताच्या उपलब्धतेमध्ये अडचणी निर्माण होतात. त्या ऐवजी युरिया आणि सिंगल सुपर फॉस्फेट खतांचा एकत्र वापर केल्यास तो फायदेशीर ठरेल. याशिवाय डीएपी खताच्या एका गोणी ऐवजी युरिया अर्धी गोणी आणि ट्रिपल सुपर फॉस्फेट (टीएसपी) एक गोणी खतांचा वापर केल्यास तो देखील डीएपी खतास चांगला पर्याय आहे.
- संजय काचोळे, जिल्हा अधीक्षक कृषी अधिकारी

खरीप हंगामासाठी मंजूर खतसाठा
महिना - मंजूर खत (टन)
मे - २३,५२६
जून - ४६,१०७
जुलै - ४४,०४९
ऑगस्ट - ३६,९३८
सप्टेंबर - ३०,५७७