शिरूर, ता. १३ : मंत्रालयातील कार्यसन अधिकारी प्रवीण शिशुपाल यांची आई व सासू यांच्या स्मृती दिनानिमित्त येथील प्रवीण शिशुपाल सोशल फाऊंडेशनच्या वतीने शनिवारी (ता. १५) येथे मोफत आरोग्य व रक्तदान शिबिर आयोजित केले आहे.
शिरूर येथील नगरपरिषद मंगल कार्यालयात सकाळी १० ते सायंकाळी ४ या वेळेत होणाऱ्या या शिबिराचे उद्‍घाटन समाजकल्याण मंत्री संजय शिरसाट यांच्या हस्ते होणार आहे. रुबी हॉल रक्तपेढी व डॉ मनोहर डोळे फाउंडेशन यांचे सहकार्य या शिबिराला लाभणार आहे. या शिबिरात सर्व रोग निदान, मोफत डोळे तपासणी, मोतीबिंदू उपचार व शस्त्रक्रिया या बाबींचा समावेश असल्याची माहिती फाउंडेशन चे अध्यक्ष फिरोज सय्यद यांनी दिली. मोफत उपचाराबरोबरच रुग्णांना मोफत गोळ्या, औषधे, नंबरचे चष्मे, तसेच प्रत्येक रक्तदात्याला प्रमाणपत्र, स्मरणचिन्ह व भेटवस्तू दिली जाणार असल्याचेही सय्यद यांनी सांगितले.