वाल्हे, ता. २० : वाल्हे (ता. पुरंदर) ग्रामपंचायत हद्दीतील कामठवाडी परिसरात रविवारी (ता. १९) सायंकाळी पाच वाजता बिबट्याचे दर्शन झाल्याने शेतकरी, मजूर आणि ग्रामस्थांमध्ये मोठी खळबळ उडाली आहे. सध्या रब्बी हंगामाची लगबग सुरू असून, शेतामध्ये काम करणाऱ्या शेतकऱ्यांना बिबट्या दिसल्यामुळे परिसरात भीतीचे वातावरण पसरले आहे. येथील मरिआई मंदिराशेजारी असलेल्या शेतात कामासाठी जात असताना अथर्व दुर्गाडे याला जवळील मका पिकाच्या शेतातून अचानक बिबट्या बाहेर येताना दिसला. मात्र, त्याने प्रसंगावधान राखत धाडसाने इतर शेतकऱ्यांना सतर्क राहण्याचा इशारा दिला. स्थानिक ग्रामस्थांनी तत्काळ या घटनेची माहिती ग्रामपंचायत सदस्य तेजस दुर्गाडे यांना दिली. त्यानंतर दुर्गाडे यांनी वनविभागाकडे त्वरित पिंजरा लावण्याची मागणी केली आहे.