मुंबई, ता. ७ : ‘खालिद का शिवाजी’ या चित्रपटाचे प्रदर्शन पुढे ढकलण्यात आले आहे. हा चित्रपट ८ ऑगस्टपासून चित्रपटगृहात प्रदर्शित होणार होता; मात्र आता हा कधी प्रदर्शित होणार, हे अद्याप सांगण्यात आलेले नाही.
नुकत्याच पार पडलेल्या महाराष्ट्र राज्य चित्रपट पुरस्कारामध्ये ‘खालिद का शिवाजी’ हा चित्रपट बंद करा, अशी मागणी काही अज्ञात व्यक्तींकडून करण्यात आली होती. त्यावर मुख्यमंत्र्यांनी प्रतिसाद देत म्हटले, ‘तेव्हा तुम्ही तुमचे म्हणणे मांडले, आता कार्यक्रम बिघडवू नका’ आणि आपल्या भाषणाला सुरवात केली. घोषणाबाजी करणाऱ्यांना तत्काळ सुरक्षारक्षकांनी बाहेर नेले. या वादामुळे आता चित्रपटाचं नियोजित प्रदर्शन अनिश्चित काळासाठी पुढे ढकलण्यात आले आहे.
महाराष्ट्र सरकारने चित्रपटातील काही संवादांबाबत आक्षेप घेतला असून, चित्रपटाच्या सेन्सॉर प्रमाणपत्राचे पुनर्परीक्षण करण्याची मागणी केंद्रीय माहिती व प्रसारण मंत्रालयाकडे केली आहे. सरकारकडून पाठवलेल्या पत्रात नमूद केले आहे की, चित्रपटातील काही दृश्य व संवाद चुकीचे आहेत. त्यामुळे जनभावना दुखावल्या जाऊ शकतात आणि कायदा-सुव्यवस्थेचा प्रश्न निर्माण होऊ शकतो.
विशेष बाब म्हणजे, या वादग्रस्त चित्रपटाची कान्स फिल्म फेस्टिव्हलसाठी निवड झाली होती. त्यामुळे हा चित्रपट चर्चेत आला होता.