पुणे, ता. १४ ः अखिल भारतीय मराठी नाट्य परिषदेच्या नियामक मंडळावर पुणे विभागाच्या सात प्रतिनिधींची बिनविरोध निवड झाली आहे. पुणे विभागाच्या सात जागांसाठी २० उमेदवारांचे अर्ज आले होते, मात्र त्यातील १३ उमेदवारांनी माघार घेतली.
पुण्यातून भाऊसाहेब भोईर, मेघराज राजेभोसले, सुहास जोशी, सुरेश धोत्रे, दीपक रेगे, सत्यजित धांडेकर आणि समीर हंपी यांची बिनविरोध निवड झाली. माधव अभ्यंकर, सुनील महाजन, दीपाली शेळके, बाबा पाटील, संतोष रासने, विजय पटवर्धन, भैरवनाथ शेरखाने, सुदाम परब आदींनी उमेदवारी अर्ज मागे घेतले. अर्ज मागे घेत निवडणूक बिनविरोध करण्यासाठी सहकार्य केलेल्या उमेदवारांचे भाऊसाहेब भोईर, दीपक रेगे, सत्यजित धांडेकर आणि समीर हंपी यांनी मंगळवारी पत्रकार परिषदेत आभार मानले.
परिषदेच्या नियामक मंडळाच्या ६० जागांसाठी निवडणूक होत असून त्यासाठीचे अर्ज मागे घेण्याची मुदत मंगळवारी संपुष्टात आली. आता १६ एप्रिल रोजी मतदान होणार असून त्याच दिवशी मतमोजणी करून विजयी उमेदवारांच्या नावांची घोषणा करण्यात येणार आहे.