सकाळ वृत्तसेवा
पुणे, ता. ११ : श्री संत ज्ञानेश्वर महाराज आणि श्री संत तुकाराम महाराज पालखी सोहळ्याच्या पूर्वतयारीची कामे निर्धारित वेळेत पूर्ण करावीत आणि निर्मल व हरित वारीसोबत हा सोहळा वारकऱ्यांसाठी आनंददायी होईल, यासाठी प्रयत्न करावेत, असे आदेश विभागीय आयुक्त सौरभ राव यांनी दिले. तसेच यंदा जी-२० बैठकीसाठी १५० पेक्षा अधिक प्रतिनिधी यादरम्यान पुण्यात मुक्कामाला असणार आहेत. या प्रतिनिधींना राज्याच्या या समृद्ध सांस्कृतिक परंपरेची माहिती देण्यात येणार असल्याचे राव यांनी सांगितले.
आषाढी एकादशी यात्रा पालखी सोहळ्याच्या पूर्वतयारीसाठी आयोजित बैठक विभागीय आयुक्त राव यांच्या अध्यक्षतेखाली झाली. यावेळी पिंपरी चिंचवड मनपा आयुक्त शेखर सिंह, कोल्हापूर विभागाचे विशेष पोलिस महानिरीक्षक सुनील फुलारी, पुण्याचे सहपोलिस आयुक्त संदीप कर्णिक, सातारा जिल्हाधिकारी रुचेश जयवंशी, पुणे महानगरपालिकेचे अतिरिक्त आयुक्त डॉ. कुणाल खेमनार, विभागीय आयुक्तालयाच्या उपायुक्त वर्षा लड्डा आदींसह, पालखी सोहळ्याचे प्रमुख पदाधिकारी, विविध विभागांचे अधिकारी उपस्थित होते.

सौरभ राव म्हणाले...
- राष्ट्रीय महामार्ग प्राधिकरण आणि सार्वजनिक बांधकाम विभागाने पालखी मार्गावरील रस्त्यांची आवश्‍यक दुरुस्ती करावी.
- जिल्हा परिषदांनी शौचालयाची सातत्याने स्वच्छता होईल याकडे विशेष लक्ष द्यावे.
- पालखी सोहळा नियोजनासाठी जिल्हाधिकाऱ्यांच्या पातळीवर बैठका घेण्यात आल्या आहेत.
- पालखी मार्ग आणि पालखी तळावरील विविध सुविधांसाठी आवश्‍यक नियोजन करण्यात आले आहे.
- रस्ते दुरुस्ती, सपाटीकरण, अतिक्रमण काढणे, वारकऱ्यांना देण्यात येणाऱ्या सुविधांबाबतही आवश्‍यक कार्यवाही करण्यात आली आहे.
- पुणे जिल्हा प्रशासनाने वारीच्या नियोजनाची माहिती देण्यासाठी मोबाईल ॲपचा उपयोग करावा.
- वारकऱ्यांना पिण्याच्या पाण्याची कमतरता भासू दिली जाणार नाही.

पालखी तळावर आवश्‍यक सुविधा करण्यात येत आहे. पालखी मार्गावर अतिरिक्त मोबाईल टॉवर उभारण्यात येत आहेत. वरिष्ठ अधिकाऱ्यांनी पालखी तळ, विसाव्याची ठिकाणे आदी ठिकाणी भेट देऊन आवश्‍यक नियोजन करण्यात आले आहे. संपूर्ण पालखी सोहळ्यादरम्यान आवश्‍यक आरोग्य सुविधा पुरेशा प्रमाणात उपलब्ध करून देण्यात येतील.
- ज्योती कदम, निवासी उपजिल्हाधिकारी