पुणे, ता. २० : कात्रज-कोंढवा रस्त्याचे रखडलेले काम मार्गी लागण्याची शक्यता निर्माण झालेले असताना आता
याच भागातील टिळेकरनगर येवलेवाडी २४ मीटर रस्त्याच्या कामही सुरू होणार आहे. यासाठी स्थायी समिती १८ कोटी २९ लाख २० हजार रुपयांच्या निविदेला मंजुरी दिली आहे. टिळेकरनगर, कामठेनगर, पानसरेनगर आणि येवलेवाडीमधील नागरिकांना यामुळे दिलासा मिळणार आहे. हा रस्ता रखडल्याने या भागातील नागरिकांना त्रास होत असल्याचा विषय ‘सकाळ’ने वारंवार मांडला होता.

गेल्या वर्षी पावसाळ्यात काम सुरू केले पण अवघे २०० फूट लांबीचे काम झाले. त्यानंतर हे काम हाती घेण्यात आले नाही. त्यानंतर या रस्त्याच्या कामासाठी २२ कोटींचे पूर्वगणनपत्रक तयार करण्यात आले. या रस्त्याच्या कामासाठी निविदा काढण्यात आली. मे. साईप्रभा कन्स्ट्रक्शनची १८ कोटी २९ लाख २० हजार रुपयांची निविदा आली. ही निविदा पूर्वगणनपत्रकापेक्षा १६ टक्कापेक्षा कमी दराने आली आहे. या निविदेला स्थायी समितीने मान्यता दिली आहे. या रस्त्याची एकूण लांबी २ किलोमीटर आहे. त्यापैकी १ हजार ४०० मीटरचा लांबीचा रस्ता २४ मीटर रुंद आहे. तर उर्वरित ६०० मीटर रस्ता १० मीटरचा आहे. या कामाला मंजुरी मिळाल्याने येत्या वर्षभरात हा रस्ता नागरिकांसाठी उपलब्ध होईल.

पर्यायी रस्ता नागरिकांना सोयीचा
कात्रज-कोंढवा रस्त्यावर इस्कॉन मंदिर चौकाजवळून येवलेवाडीला जाणारा रस्ता अरुंद आहे. तो अपूर्ण विकसित झाला असल्याने नागरिकांना गैरसोयीचा आहे. खडी मशिन चौकाकडून पानसरेनगर, येवलेवाडीला अवघड जात असल्याने हा पर्यायी रस्ता येवलेवाडीच्या नागरिकांसाठी सोयीचा आहे. तसेच हा रस्ता खडी मशिन चौकाकडून बोपदेव घाटाकडे जाणाऱ्या रस्त्याला समांतर असणार आहे. वाढती वाहतूक कोंडी यामुळे याचे काम लवकर व्हावे अशी मागणी केली जात आहे.