पुणे, ता. ४ : पूर्व भागातील कस्तुरे चौक गणेशोत्सव मंडळाने आगळा वेगळा उपक्रम राबवत गणपती बघायला येणाऱ्या भाविकांना प्रसादासोबत देशी झाडांचे बीजगोळे देण्यात आले. यासोबतच देशी झाडांच्या बियादेखील वाटण्यात आल्या. कार्यकर्त्यांनी देशी झाडांचे रोपण आणि संवर्धनाचा संकल्प करत दर्शनासाठी येणाऱ्या भाविकांनाही त्याचे महत्त्व पटवून दिले. मंडळातर्फे १ हजार हून अधिक बीजगोळे आणि देशी झाडांच्या बिया गणेश भक्तांना देण्यात आले आहेत. यावेळी मंडळाचे अध्यक्ष राजेश होनराव, वनेश गोरले, अभिजित मानकर, दीपक कोंढरे, बाबा सट्टे, सुयश भगत, योगेश येनपुरे, धनराज राठी, ॲड. उमेश झाडे, बंटी मोटे, संजय धांडे व मंडळाचे सर्व कार्यकर्ते उपस्थित होते. होनराव म्हणाले, सध्या देशी झाडांचे प्रमाण कमी होत चालले आहे. देशी झाडे केवळ सावली, ऑक्सिजन आणि औषधी गुणधर्मासाठीच नव्हे तर पक्षी व प्राण्यांसाठीही उपयुक्त ठरतात. त्यामुळे देशी झाडांचे बीजगोळे वाटप केले.