पुणे, ता. २८ ः भरधाव टेम्पोच्या धडकेत पादचाऱ्याचा मृत्यू झाल्याची घटना गुलटेकडी परिसरात घडली. या प्रकरणी टेम्पोचालकावर गुन्हा दाखल करण्यात आला आहे.
यल्लप्पा अर्जुन पोटे (वय ४२, रा. गंगाराम स्वीट्सशेजारी, डायस प्लॉट, गुलटेकडी) असे मृत्युमुखी पडलेल्या पादचाऱ्याचे नाव आहे. पोटे यांचा मुलगा सुमीत याने याबाबत स्वारगेट पोलिस ठाण्यात फिर्याद दिली आहे. पोलिसांनी दिलेल्या माहितीनुसार, पोटे आणि त्यांचा मुलगा सुमीत शनिवारी (ता. २६) रात्री साडेनऊच्या सुमारास जेवणाचा डबा आणण्यासाठी गुलटेकडीतील डायस प्लॉट चौकातून निघाले होते. पोटे रस्ता ओलांडून स्वच्छतागृहात निघाले होते. त्यावेळी भरधाव टेम्पोने रस्ता ओलांडणारे पोटे यांना धडक दिली. अपघातानंतर घटनास्थळी न थांबता टेम्पोचालक पसार झाला. अपघातात गंभीर जखमी झालेल्या पोटे यांना रुग्णालयात दाखल करण्यात आले. उपचारांपूर्वीच त्यांचा मृत्यू झाला होता.