पुणे, ता. २१ : चॉकलेटच्या बहाण्याने सात वर्षीय चिमुकल्यावर अनैसर्गिक अत्याचार करून जीवे ठार मारण्याची धमकी देणाऱ्यास न्यायालयाने दुहेरी जन्मठेपेसह ३० हजार रुपये दंडाची शिक्षा सुनावली. अतिरिक्त सत्र न्यायाधीश के. डी. शिरभाते यांनी हा निकाल दिला. दंड न भरल्यास सहा महिने अतिरिक्त कारावास भोगावा लागेल, असेही निकालात नमूद केले आहे.
उमेश विष्णू जाधव (वय ४०, रा. उत्तमनगर. मुळ रा. कुर्डुवाडी, जि. सोलापूर) असे शिक्षा झालेल्याचे नाव आहे. ही घटना २६ जुलै २०१६ रोजी रात्री साडेआठच्या सुमारास उत्तमनगर परिसरात घडली होती. या प्रकरणी मुलाच्या आईने उत्तमनगर पोलिस ठाण्यात फिर्याद दिली आहे. घटनेच्या दिवशी आरोपीने चॉकलेटच्या बहाण्याने चिमुकल्याला खोलीत बोलाविले. त्यानंतर त्यास मारहाण करत रुमालाने गळा दाबून त्याच्यावर अनैसर्गिक अत्याचार केले. हा प्रकार कोणाला सांगू नये म्हणून डोक्यात दगड घालून जीवे मारण्याची धमकी दिल्याचे फिर्यादीत नमूद केले आहे. त्यानंतर, पोलिसांनी आरोपीला तत्काळ अटक करत त्याविरोधात न्यायालयात दोषारोपपत्र दाखल केले होते.
या खटल्याचे कामकाज सरकार पक्षातर्फे सरकारी वकील नितीन कोंघे यांनी पाहिले. गुन्हा सिद्ध करण्यासाठी त्यांनी नऊ साक्षीदार तपासले. आरोपीने केलेला गुन्हा गंभीर स्वरूपाचा आहे. आरोपीने हा गुन्हा केला आहे, हे सिद्ध करणारे पुरावे समोर आले आहे. ते न्यायवैद्यक विभागाने दिलेल्या अहवालावरून स्पष्ट झाले असल्याने आरोपीला कठोरात कठोर शिक्षा द्यावी, असा युक्तिवाद अ‍ॅड. कोंघे यांनी केला.