खडकवासला, ता. २१ : सिंहगडावर शनिवारी आणि रविवारी सुट्टीच्या दिवशी निसर्गाचे मनोहारी रूप पाहायला मिळाले. गडावर दाट धुक्याची चादर पसरली होती, आकाशात ढग दाटले होते आणि पावसाच्या चार-पाच सरी बरसून जात होत्या. या सरींमुळे हवेत गारवा जाणवू लागला. अशा निसर्गरम्य वातावरणाचा आनंद लुटण्यासाठी पर्यटकांनी सिंहगडावर मोठ्या प्रमाणावर गर्दी केली.
सिंहगड किल्ल्यावर शनिवारी (ता. १९) आणि रविवारी (ता. २०) या दोन दिवसांत सुमारे १५ हजार पर्यटकांनी भेट दिली. दोन्ही दिवसांत मिळून दोन लाख आठ हजार इतक्या उपद्रवशुल्काची रक्कम जमा झाली आहे.
शनिवारी ८१४ दुचाकी आणि ३८० चारचाकी अशा एकूण १,१९४ वाहनांद्वारे अंदाजे ३, ९९४ पर्यटक गडावर पोहोचले. याशिवाय खासगी प्रवासी वाहतूक करणाऱ्या वाहनांतून २, ५०० पर्यटकांनी गडावर प्रवेश केला. असे एकूण ६,४९४ पर्यटक आले होते. शनिवारी ७८ हजार ७०० रुपयांचे उपद्रव शुल्क जमा झाले आहे.
रविवारी १,४८४ दुचाकी आणि ५५८ चारचाकी अशा २,०४२ वाहनांतून सुमारे ४,४७२ पर्यटकांनी गडावर प्रवेश केला. खासगी प्रवासी वाहनांतून आणखी ३,७०० पर्यटक आले. असे एकूण ८१७२ पर्यटक आले होते. असे एकूण १४ हजार ६६६ पर्यटक गडावर आले होते. रविवारी एकूण १,३०,१०० रुपयांचे उपद्रव शुल्क जमा झाले आहे. किल्ल्यावर बंदी असतानाही मद्याचे साहित्य घेऊन जाणाऱ्या एका व्यक्तीवर थेट दंडात्मक कारवाई करण्यात आली.
=================
सिंहगड : शनिवारी आणि रविवारी सुट्टीच्या दिवशी पर्यटकांची मोठी गर्दी झाली होती. वाहनांच्या रांगा लागल्या होत्या.
फोटो ः 69992, 69993, 69994