पुणे - ‘वंदे भारत’च्या प्रवासाची पुणेकरांची प्रतीक्षा अखेर संपली आहे. आता पुण्याहून मुंबईला तीन तास पाच मिनिटांमध्ये प्रवास करणे शक्य होणार आहे. शुक्रवारी (ता. १०) पंतप्रधान नरेंद्र मोदी यांच्या हस्ते छत्रपती शिवाजी महाराज टर्मिनस (मुंबई) स्थानकावर मुंबई-सोलापूर व मुंबई व साईनगर शिर्डी या दोन वंदे भारत एक्स्प्रेसचे उद्‍घाटन होणार आहे.

ही रेल्वे पुणे स्थानकावरून धावणार असल्याने पुणेकरांना या रेल्वेने मुंबई व सोलापूरचा प्रवास करता येणार आहे. हा प्रवास वेगवान तर आहेच, शिवाय तो वेगळी अनुभूती देणारादेखील आहे. शुक्रवारी मध्य रेल्वेची पहिली व भारतातील ९ वी रेल्वे पुण्याहून धावणार आहे. याबाबत ‘सकाळ’ने पाठपुरावा केला होता.