पुणे : वाहतूक नियमांचे उल्लंघन करणाऱ्या बेशिस्त पीएमपी आणि एसटी बसचालकांवर वाहतूक शाखेने विशेष मोहीम राबवून कारवाई केली. केवळ एकाच आठवड्यात २६० पीएमपी बसचालकांनी नियमांचे उल्लंघन केल्याचे समोर आले आहे.

पीएमपी आणि एसटी बसचालकांकडून वाहतूक नियमांचे उल्लंघन केले जात आहे. अशा बसचालकांमुळे नागरिकांचा जीव धोक्यात येत आहे. शहर वाहतूक शाखेकडून दोन ते आठ ऑक्टोबर या कालावधीत विशेष मोहीम राबविण्यात आली.

त्यात २६० पीएमपी बसचालक आणि ५१ एसटी बसचालकांवर कारवाई करण्यात आली. रहदारीस अडथळा निर्माण करणे, बस थांब्यावर न थांबता रस्त्याच्या मध्यभागी बस थांबवणे, झेब्रा क्रॉसिंगवर थांबणे आणि सिग्नलचे उल्लंघन करून धोकादायक पद्धतीने बस चालविल्याप्रकरणी त्यांच्यावर दंडात्मक कारवाई करण्यात आली आहे.

काही पीएमपी बसचालकांकडून बेदरकारपणे बस चालवत असल्याच्या घटना घडत आहेत. याबाबत बसचालकांचे समुपदेशन करण्यात आले.

तसेच, पीएमपीच्या वरिष्ठांना लेखी कळविण्यात आले आहे. नागरिकांचा जीव धोक्यात घालणाऱ्या बसचालकांबाबत मुलाहिजा बाळगला जाणार नाही. नियमांचे उल्लंघन करणाऱ्या बसचालकांविरुध्द गुन्हा दाखल करण्यात येत आहे.

- विजयकुमार मगर, पोलिस उपायुक्त, शहर वाहतूक शाखा

बसचालकांवरील कारवाई

(२ ऑक्टोबर ते २१ ऑक्टोबर २०२३)

• पीएमपी बसचालक ३२५

• एसटी बसचालक ११०