मांजरी : हडपसर मतदारसंघात झालेली विकासकामे हा माझा प्रचार असून सर्वसामान्य जनता ही माझी ताकद आहे. रामटेकडी भागाच्या विकासासाठी माझा नेहमीच प्रयत्न राहिला आहे. पुढील काळात रामटेकडी परिसरातील झोपडपट्टीसाठी प्रधानमंत्री आवास योजना (शहरी ) राबवण्यासाठी माझा प्रयत्न राहणार आहे, असे सांगत येथील मतदार माझ्या पाठी खंबीर राहून मलाच मताधिक्य देतील, असा विश्वास महायुतीचे उमेदवार आमदार योगेश टिळेकर यांनी व्यक्त केला. 

भाजप, शिवसेना, आरपीआय, राष्ट्रीय समाज पक्ष, शिवसंग्राम व रयत क्रांती महायुतीचे उमेदवार आमदार योगेश टिळेकर यांच्या प्रचारासाठी आज रामटेकडी येथे पदयात्रा व सभेचे आयोजन करण्यात आले होते. त्यावेळी मतदारांशी हितगुज करताना टिळेकर बोलत होते.

यावेळी क्रांती सामाजिक संस्थेचे अध्यक्ष खन्नासिंग कल्याणी, उपाध्यक्ष भगतसिंग कल्याणी, चाँदसिंग कल्याणी, शक्तीसिंग कल्याणी, वैशाली शिंदे, नाशरजंग हक्कानी, डॉ ज्ञानोबा मुंडे आदी कार्यकर्ते व पदाधिकारी उपस्थित होते. 

टिळेकर म्हणाले," या अगोदरच्या सत्ताधाऱ्यांनी राबविलेल्या चुकीच्या धोरणांमुळे हडपसर मतदार संघातील सर्वसामान्य जनतेला न्याय मिळालाच नाही. या खाच-खळग्यातुन मार्ग काढीत गेल्या पाच वर्षात रस्ते विकास, पाणी, वीज, आरोग्य आदी क्षेत्रात विकासाला गती देण्याचे काम मी केले आहे. सय्यदनगर, रामटेकडीचा वाहतूक कोंडीचा विळखा सोडविण्यासाठी माझा प्रामाणिक प्रयत्न झाला आहे. अधिकाधिक गरिबांना घरांसह विविध योजना देण्यात माझी आघाडी राहिली आहे. त्यामुळे पुन्हा एकदा हा सर्वसामान्य माणूस मला प्रतिनिधीत्व करण्याची संधी देईल, यावर माझा विश्वास आहे.'