Women's day 2021 : 

आम्ही पुरुष पुरुष ।
उच्च ज्ञातीचे सदृश्य।
आम्हा काळजी विशेष।
बाईकांची।।

काय वानू आता देवा ।
पूज्य बाईचा महिमा ।
तिच्याविण काय आम्हा।
अर्थ आहे?।।

एका बाईसाठी किती ।
संगर नि महायुद्धे।
पराक्रमी थोर गद्धे ।
धारातीर्थी ।।

कुण्या बिराण्या गं देशी ।
कुणी राणी क्लिओपात्रा।
तिच्यासाठी युध्दे सत्रा। ।।

झडली गा।।

बाई गाजविते तेग।
बाई घडविते जग।
बाई जिरवते रग।
इतिहासी ।।

मज वाचीव गे बाई।
तूचि देवी, तूचि माता।
गातो आम्ही येताजाता ।
तुझे स्तोत्र।।

कधी म्हणो नये कोणी।
बाई पायीचीच व्हाण।
गावे तिचे यशोगान।
आज तरी ।।

बाई यंव आणि त्यंव।
बाई नित्य अभिनव।
नर आणिक पुंगव।
शरणार्थी।।

बरे केले देवा देवा ।
नाही केलो मज बाई।
बापयाची हीच ध्याई।
धन्य झाली।।

आम्हा बापयांचे जगी।
सारे आम्ही शहाजोग।
शक्य तसा बाईभोग।
घेतो रोज ।।

बाईपण थोर होय।
तीच अंतराची कोय।
तशी शेजेची गा सोय।
एरवी हो ।।

म्हणू मोठ्या मोठ्या तोंडी।
बाई नव्हे, तूचि माता।
आणि घालू घरी लाथा।
बेलाशक ।।

ढोल असो वा गंवार।
असो पशु किंवा नार।

ताडनाचा अधिकार।
तिन्ही लोकीं।।

ऐसा सारा दंभ दंभ ।
भरलासे माझ्या अंगी।
कसा करु सांगोपांगी।
उपचार ।।

विश्वंभरा , तुझ्या गावी।
उभी एकली विठाई।
का रे दूर रखुमाई।
उभी केली?।।

बाई आणिक पुरुष।
दोन्ही अद्वैताचे अंग।
एक एकाचे अर्धांग।
आहे ना रे?।।

विठो जेथ आहे उभा।
तेथ रखुमाईचे ठाण।
साजिरे गा समचरण।
विटेवरी।।

- संपादकीय लेख वाचण्यासाठी येथे ► क्लिक करा

(Edited by: Ashish N. Kadam)