कऱ्हाड : राजमाची (ता. कऱ्हाड) येथील कॉलेजच्या पाठीमागे एका शिवारात काल सकाळी सडलेल्या स्थितीतील मानवी हाडांचा सांगाडा आढळला. त्याची माहिती पोलिस पाटील सतीश काशीद यांनी पोलिसांना (Karad Police) दिली. फॉरेन्सिक टिम व श्वान पथकाकडून घटनास्थळाची पाहणी करण्यात आली.

दरम्यान, तो सांगाडा सडलेल्या स्थितीत असल्याने तो महिलेचा का पुरुषाचा हे स्पष्ट झाले नाही. याबाबत माहिती अशी ः राजमाची येथे एका कॉलेजच्या पाठीमागे एका शिवारात सूरज पवार यांच्या उसाच्या शेतात काही महिला भांगलण करत होत्या. या वेळी त्यांना दुर्गंधी आल्याने त्यांनी शेताचे मालक सूरज पवार यांना त्याची माहिती दिली.

त्यावर सूरज पवार यांनी तेथे जाऊन पाहिले असता त्यांना कॉलेजच्या पाठीमागील डोंगराकडील बाजूस असलेल्या ओघळीच्या कडेला मानवी हाडांचा सांगाडा पडल्याचे दिसले. त्यांनी त्याची माहिती तत्काळ सरपंच शिवाजीराव डुबल व पोलिस पाटील सतीश काशीद यांना दिली. सतीश काशीद यांनी त्याची माहिती पोलिसांत दिली. माहिती मिळताच पोलिस उपअधीक्षक अमोल ठाकूर व वरिष्ठ पोलिस निरीक्षक बी. आर. पाटील यांनी घटनास्थळी धाव घेतली.

तेथील पाहणी केल्यानंतर पोलिस उपअधीक्षक ठाकूर म्हणाले, ‘‘घटनास्थळी केवळ मानवी हाडांचा सांगाडा आढळून आला आहे. प्राथमिक माहिती व पाहणीनुसार अकस्मात मृत्यूची नोंद करण्यात आली आहे. फॉरेन्सिक टिम व श्वान पथकाला घटनास्थळी पाचारण करण्यात आले आहे. सदरचा मृत्यू हा नैसर्गिक, आत्महत्या की घातपात आहे याचा उलगडा करण्याचा प्रयत्न व मृतदेहाची ओळख पटविण्याचे काम पोलिस करत आहेत.’’ दरम्यान, या प्रकाराने खळबळ उडाली आहे.

...अशीही शक्यता

एक फिरस्ता मनोरुग्ण पंधरा दिवसांपूर्वी संबंधित सांगाडा सापडलेल्या परिसरात फिरत असल्याची माहिती स्थानिकांनी दिली आहे. त्या वेळी काही शेतकऱ्यांनी संबंधित मनोरुग्णाला त्या परिसरातून हटकले होते. मात्र, तो मनोरुग्ण पुन्हा त्या परिसरात येत होता, असे तिथल्या काही शेतकऱ्यांनी सांगितले. त्यामुळे हा मृतदेह संबंधित मनोरुग्णाचा नाही ना, याबाबत चर्चा सुरू झाली आहे.