कुडाळ : जावळी कृषी उत्पन्न बाजार समितीच्या माध्यमातून संस्थेच्या उत्पन्न वाढीसाठी आवश्यक ते सर्व प्रयत्न केले जातील, संस्थेची निवडणूक बिनविरोध होण्यासाठी तालुक्यातील सर्व गट-तट एकत्र आले. मात्र, दरवेळी कोणतीही निवडणूक लागली की काहींना निवडणूक लादण्याची हौस येते. मात्र, प्रत्येक निवडणुकीत मतदार त्यांना मताच्या रूपात त्यांची जागा दाखवून देतात, त्यामुळे अशा विरोधकांचा विषय आता तालुक्यातून संपल्यात जमा असल्याचे मत आमदार शिवेंद्रसिंहराजे भोसले यांनी व्यक्त केले.

जावळी- महाबळेश्वर कृषी उत्पन्न बाजार समितीची (Jawali Krushi Utpanna Bazar Samiti) वार्षिक साधारण सभा कुडाळ (ता. जावळी) येथे झाली, त्यावेळी आमदार भोसले (Shivendraraje Bhosale) बोलत होते. ते म्हणाले, ‘‘महू हातगेघर धरणाचे काम पूर्ण होऊन लवकरात लवकर शिवारात पाणी यावे, यासाठी आम्ही प्रयत्नशील असून, जसे बोंडारवाडीचे काम मार्गी लावले, तसेच महू हातगेघरचे कामही उपमुख्यमंत्री देवेंद्र फडणवीस यांच्या सहकार्याने लवकरच मार्गी लागेल.

तसेच बाजार समितीच्या (Kudal Bazar Samiti) नवीन संचालक मंडळाची वाटचाल योग्य दिशेने सुरू असून, यासाठी सभासद शेतकऱ्यांनी त्यांना सहकार्य करावे, बाजार समितीच्या वतीने नवीन इमारत, व्यापारी गाळे, पेट्रोल पंप, आदी नवीन प्रकल्प प्रस्तावित आहेत, तेही लवकरच पूर्णत्वास जातील, येणाऱ्या हंगामात प्रतापगड कारखाना जोमाने सुरू होणार असून, सर्व शेतकऱ्यांनी जास्तीतजास्त ऊस तालुक्यातील आपल्या हक्काच्या कारखान्यालाच द्यावा.

यावेळी माजी उपाध्यक्ष वसंतराव मानकुमरे, प्रतापगडचे अध्यक्ष सौरभ शिंदे, माजी शिक्षण सभापती अमित कदम, राजेंद्र राजपुरे, ज्ञानदेव रांजणे, सभापती जयदीप शिंदे, उपसभापती हेमंत शिंदे यांच्यासह सर्व संचालक, विविध क्षेत्रातील पदाधिकारी, शेतकरी उपस्थित होते.

बाजार समितीचे सभापती जयदीप शिंदे यांनी या सभेमध्ये बाजार समितीने उत्पन्न वाढ व विकासाच्या दृष्टीने केलेली उपाययोजनांची माहिती दिली, तर उपसभापती हेमंत शिंदे यांनी सर्वांचे आभार मानले. संचालक मच्‍छिंद्र मुळीक यांनी सूत्रसंचालन केले.