सातारा : सातारा-स्वारगेट विनाथांबा एसटी बसचे ब्रेकडाउन वाढले आहे. त्यामुळे प्रवाशांना नाहक मनस्ताप सहन करावा लागत आहे. प्रवाशांची गैरसोय टाळण्यासाठी एसटी विभागाने लांब पल्ल्याच्या मार्गावर चांगल्या बस पाठविण्याची मागणी प्रवाशांनी केली आहे. 

सातारा शहरातून पुण्याला जाणाऱ्या प्रवाशांची संख्या मोठी आहे. सकाळी सहा वाजल्यापासून रात्री आठ वाजेपर्यंत सातारा-स्वारगेट मार्गावर दर 30 मिनिटाला एसटी बसच्या फेऱ्या सुरू आहेत. या मार्गावरील विनावाहक एसटी बसला प्रवाशांचा चांगला प्रतिसाद मिळत आहे. मात्र, या मार्गावर बस नादुरुस्त होण्याचे (ब्रेकडाउन) प्रमाण वाढल्याने प्रवाशांची गैरसोय होत आहे. सततच्या ब्रेकडाउनमुळे सकाळच्या सुमारास शिक्षण व नोकरीनिमित्त पुण्याला जाणाऱ्या प्रवाशांना नाहक मनस्ताप सहन करावा लागत आहे.

एका सिगारेटने केले कोटीचे नुकसान; साताऱ्यात पाच शिवशाही जळून खाक
 
सातारा-स्वारगेट मार्गावर सुमारे 35 फेऱ्यांचे संचलन सुरू असते. या मार्गावर प्रवाशांचा उत्तम प्रतिसाद मिळत असूनही प्रवाशांना चांगल्या सेवा देण्यासाठी एसटी प्रशासन कमी पडताना दिसते. सततच्या ब्रेकडाउनमुळे एसटीचे वेळापत्रक कोलमडत असून प्रशासनाच्या चुकीच्या कारभाराचा फटका प्रवाशांना बसत आहे. या मार्गावरील ताफ्यातील काही बसच्या सतत तांत्रिक अडचणीमुळे काही नवीन बसही बंद पडण्याचे प्रकार वाढले आहेत. दरम्यान, रविवारी (ता. 7) दुपारच्या सुमारास सातारा-स्वारगेट मार्गावर लिंबखिंड या ठिकाणी दुपारच्या सुमारास बस ब्रेकडाउन झाल्याने प्रवाशांचा खोळंबा झाला होता. भर उन्हात 30 ते 40 मिनिटे ताटकळत थांबावे लागल्याने प्रवाशांचे अतोनात हाल झाल्याचे पाहावयास मिळाले. 

मुंबईत अडकल्या साताऱ्याच्या 100 गाड्या; लालपरीच्या काळजीने प्रवाशांच्या जीवाला घोर!

सातारा-स्वारगेट मार्गावर बसने दररोज प्रवास करतो. मात्र, अनेकदा बसच्या ब्रेकडाउनचा फटका बसला आहे. चांगली सेवा देण्याची जबाबदारी एसटी प्रशासनाची आहे. सातारा- स्वारगेट व इतर लांब पल्ल्याच्या वर्दळ असणाऱ्या मार्गावर नवीन बस देण्याची गरज आहे. 
-सतीश जगताप, प्रवासी 

साताऱ्याच्या बातम्या वाचण्यासाठी येथे ► क्लिक करा

• प्रवाशांनी विनावाहक-विनाथांबा सातारा-पुणे या बससेवेचा अनुभव sakal_satara@esakal.com येथे मेल करावा.

संपादन : बाळकृष्ण मधाळे