Dhule News : जिल्ह्यात एकूण ३६ लाखांवर नोंदी तपासण्यात आल्या. त्यातील कुणबी, मराठा-कुणबी, कुणबी-मराठा अशा एकूण ९५ हजार ९४८ नोंदी आढळून आल्या आहेत.

अशी माहिती सहाय्यक नोडल अधिकारी तथा निवासी उपजिल्हाधिकारी नितीन गावंडे यांनी प्रसिद्धीपत्रकातून दिली. (96 thousand Kunbi caste records in Dhule district news)

राज्यातील कुणबी, मराठा-कुणबी, कुणबी-मराठा जातीचे जातप्रमाणपत्र पात्र व्यक्तींना जातप्रमाणपत्र वितरित करण्यासाठी महाराष्ट्र शासन सामान्य प्रशासन विभागाकडील शासन निर्णय ३१ ऑक्टोबर २०२३ मधील निर्देशाप्रमाणे तालुकास्तरावरील व जिल्हास्तरावरील विविध शासकीय विभागातील १९६७ पूर्वीच्या कागदपत्रांची पडताळणी/तपासणी करण्याबाबत सूचित करण्यात आले होते.

त्यास अनुसरून धुळे जिल्ह्यातील तालुकास्तरावरील व जिल्हास्तरावरील विविध शासकीय विभागातील १९६७ पूर्वीच्या कागदपत्रांची पडताळणी/तपासणी करण्यात आली असून, जिल्ह्यात एकूण ३६ लाख ६१ हजार ५३० नोंदी तपासण्यात आल्या आहेत.

त्यात कुणबी, मराठा-कुणबी, कुणबी-मराठा अशा आढळून आलेल्या नोंदींची एकूण संख्या ९५ हजार ९४८ आहे. जिल्ह्यात विविध विभागांत आढळून आलेल्या कुणबी, मराठा-कुणबी व कुणबी-मराठा नोंदीचे दस्तऐवज स्कॅन करून जिल्ह्याच्या https://dhule.gov.in/kunbi-documents/ या संकेतस्थळावर तालुकानिहाय/गावनिहाय व विभागनिहाय प्रसिद्ध करण्यात आलेल्या आहेत.

प्रमाणपत्रासाठी अर्ज करा

जिल्ह्याच्या संकेतस्थळावर प्रसिद्ध करण्यात आलेल्या नोंदी ज्या व्यक्तींच्या आहेत त्यांच्या कुटुंबातील व रक्तनात्यातील नागरिकांना जातप्रमाणपत्र उपलब्ध करून देणेकामी शासनाद्वारे सूचित करण्यात आलेले आहे.

जिल्ह्यातील सर्व नागरिकांनी जिल्ह्याच्या संकेतस्थळावर भेट देऊन त्यांच्या कुटुंबातील/रक्तनात्यातील व्यक्तींची नोंदी शोधून त्या व्यक्तींशी (नोंद नमूद असलेल्या) आपले रक्ताचे नाते सिद्ध करून (वंशावळ नमूद करून) जातप्रमाणपत्र मिळण्याकामी अर्ज करावा, जेणेकरून कुणबी, मराठा-कुणबी, कुणबी-मराठा जातीचे जातप्रमाणपत्र पात्र व्यक्तींना उपलब्ध करून देणे सोयीचे होईल, असे आवाहन सहाय्यक नोडल अधिकारी गावंडे यांनी केले आहे.