नंदुरबार : बॅटरी चोरणारी टोळीतील दोन तरुणांसह दोन अल्पवयीन मुलांना स्थानिक गुन्हे शाखेच्या पथकाने ताब्यात घेतले असून त्यांच्याकडून २८ हजाराच्या बॅटरीसह दुचाकी जप्त करण्यात आली आहे. वडझाकण येथील विकास भरत पाडवी यांच्या अंगणातून आठ हजार रुपये किमतीची ट्रॅक्टरची बॅटरी चोरी झाली होती.

उपनगर पोलिस ठाणे येथे गुन्हा दाखल होता. शुक्रवारी (ता.९) स्थानिक गुन्हे शाखेचे पोलिस निरीक्षक किरणकुमार खेडकर यांना माहिती मिळाली. खामगाव येथील राहुल भिल व त्यांचे इतर साथीदारांनी चोरी झाल्याचे पोलिसांना समजले. (Battery stealing gang in LCB Arrest Nandurbar News)

हेही वाचा : सीमावादात रक्त सांडायला मराठी माणूसच का?

नंदुरबार शहरातील माळीवाडा भागात दुचाकीवर घेऊन ती विक्री करण्यासाठी येणार आहे. त्यावरून स्थानिक गुन्हे शाखेचे पोलिस निरीक्षक किरणकुमार खेडकर यांनी पथक पाठविले. त्यावेळी राहुल लक्ष्मण भिल (वय २२ रा. खामगाव ता. नंदुरबार ) हा बॅटरी व दुचाकीसह आढळून आला.

त्याने वडझाकण येथील ट्रॅक्टरच्या बॅटरीची चोरी त्याचे साथीदार परेश पाडवी (रा. पापनेर ता.जि. नंदुरबार) व इतर तीन साथीदारांच्या मदतीने केल्याची कबुली दिली. परेश परविन पाडवी (वय २३) व दोन अल्पवयीन (सर्व रा. पापनेर ता.जि. नंदुरबार) यांना मुद्देमालासह ताब्यात घेण्यात आले.