नाशिक ः महापालिकेतील सत्ता जाण्याची भीती निर्माण झालेल्या भारतीय जनता पक्षासाठी आजचा दिवस दिलासा देणारा ठरला. महाशिवआघाडी स्थापन करताना महाराष्ट्र नवनिर्माण सेनेला गृहित न धरण्याचा संदेश मिळाला आहे. मनसेबाबतचे धोरण पक्षप्रमुख राज ठाकरे गुरुवारी (ता. 21) जाहीर करणार आहेत. त्यात एक तर तटस्थ राहणे किंवा नगरसेवकांना व्हीप बजावून मतदान करणे या दोनच सूचना मिळणार आहेत. तटस्थ राहिल्यास भाजपला थेट मदत होण्याची शक्‍यता आहे. 

भाजपला सत्तेपासून रोखण्यासाठी शिवसेना, कॉंग्रेस, राष्ट्रवादी कॉंग्रेस व मनसेने सुरवातीला प्रयत्न केले. परंतु जसे दिवस जवळ येत आहेत, त्याप्रमाणे भाजपचा विश्‍वास अधिक वाढताना दिसत आहे.

गणिते बदलू शकतात

महाशिवआघाडीतील एक-एक पक्ष पक्षश्रेष्ठींचे आदेश शिरसंवाद्य मानण्यास तयार असल्याचा निरोप मिळत असल्याने महाशिवआघाडीसमोर पेच निर्माण होत आहे. महापालिकेत भाजपचे 65 नगरसेवक आहे. शिवसेनेचे 34, कॉंग्रेस व राष्ट्रवादी कॉंग्रेसचे प्रत्येकी सात, मनसेचे अपक्ष मिळून सहा तर रिपब्लिकन पक्षाचा एक नगरसेवक आहे. विरोधकांचे सर्व नगरसेवक मिळून 55 संख्या होते. भाजपच्या सात आमदारांनी वेगळी भूमिका घेतल्यास भाजप नगरसेवकांची संख्या 58 पर्यंत पोचते. त्यापार्श्‍वभूमीवर मनसेची भूमिका महत्त्वाची ठरणार आहे. मनसेने तटस्थ राहण्याची भूमिका घेतली, तरी बहुमतासाठी 58 नगरसेवकांची गरज राहणार आहे. त्यात भाजप सहज सत्ता स्थापन करू शकेल. दरम्यान, मनसेच्या नेत्यांनी रविवारी पक्षप्रमुख राज ठाकरे यांची भेट घेतली. राज ठाकरे यांनी 21 तारखेपर्यंत वेट ऍन्ड वॉचचा संदेश दिला. 

पक्षप्रमुख राज ठाकरे यांनी 21 तारखेपर्यंत निर्णय देण्याचा संदेश दिला आहे. त्यांच्या निर्णयानंतर सत्तेत सहभागी व्हायचे की तटस्थतेची भूमिका घ्यायची, याचा निर्णय तेच घेतील. 
- सलीम शेख, माजी गटनेता, मनसे