Nandurbar News : रमजान महिन्याचा समारोप गुरुवारी (ता. ११) ईदचा चांद पाहून होणार आहे. ईदनिमित्त मुस्लिम बांधवांनी विविध खरेदीसाठी बाजारात गर्दी केली होती. त्यामुळे बाजारपेठेत ईदचा खरेदीचा उत्साह दिसून आला. गेल्या महिन्याभरापासून सुरू असलेला रमजान महिन्याचा उद्या समारोप होत आहे. म्हणजेच, उद्या ईदचा चांदचे दर्शन घेऊन मुस्लिमबांधव आपल्या महिनाभराचा रोजा उपवासाची सांगता करणार आहेत.

त्यामुळे नवीन कपडे, घरात समाज संस्कृतीनुसार बनविला जाणारा शिरखुर्मा व त्यासाठी लागणारे साहित्य खरेदी करताना आज मुस्लिमबांधव दिसून आले. नंदुरबार हे जिल्ह्याचे ठिकाण असल्याने येथील बाजारपेठेत खरेदीसाठी गर्दी दिसून आली. त्यामुळे बाजारपेठेत उत्साह होता.

दरम्यान, सकाळी नऊला येथील माळीवाडा परिसरातील ईद मैदानावर ईदची नमाजपठण होणार आहे. त्यानंतर तेथे राजकीय, सामाजिक क्षेत्रांतील मान्यवरांकडून ईदच्या शुभेच्छा देण्यासाठी सज्ज राहणार आहेत. (latest marathi news)

त्या पार्श्‍वभूमीवर पोलिसांतर्फेही ईद शांततेत पार पडावी, नागरिकांना ईदचा आनंद घेता यावा म्हणून शहरासह मुख्य चौक व रस्त्यांवर कडक पोलिस बंदोबस्त तैनात करण्यात आला आहे. तसेच शहरातील मुख्य भागात सीसीटीव्हीचीही करडी नजर राहणार आहे.