गणूर/ सोग्रस (जि. नाशिक) : चांदवड तालुक्यातील रेडगाव खुर्द येथे कांद्याच्या शेतात दोन काळविटांच्या झुंजीत दोघांचाही मृत्यू झाल्याची घटना सोमवारी (ता. १४) सकाळी घडली. वर्चस्ववादातून ही झुंज झाली असून, त्यात शेतातील ड्रीपच्या नळ्या एकमेकांच्या शिंगात अडकल्याने कुत्र्यांनी देखील याचा फायदा घेत हल्ला केल्याने यात काळविटांचा मृत्यू झाल्याचा अंदाज वर्तवला जात आहे.

रेडगाव खुर्द येथील शेतकरी वसंत सावळीराम काळे यांच्या मालकीच्या शेतात ही घटना घडली. याबाबत पोलिस पाटील यांनी तत्काळ वनविभाला कळविले. चांदवड वनविभागाच्या अधिकारी- कर्मचाऱ्यांनी घटनास्थळी धाव घेतली असता अंदाजे दीड ते दोन वर्षांच्या काळविटांची शिंगे एकमेकांत अडकलेली, शिंगास ड्रीपच्या नळ्यांचा विळखा व कुत्र्यांनी दोघांचे तोडलेले लचके अशा अवस्थेत काळवीट आढळून आले. यावरून वर्चस्ववादातून प्रथम झुंज झाली. त्यामुळे ड्रीपच्या नळ्यांचा गुंता दोघांच्याही शिंगात अडकल्याचे बघून कुत्र्यांनी काळविटांवर हल्ला चढवला आणि यात दोघांचा मृत्यू झाल्याचा अंदाज वर्तवला गेला.
पंचनामा होताच वाहेगावसाळ येथील पशुधन विकास अधिकारी मयूर विसपुते यांनी शवविच्छेदन केले. सहायक वन संरक्षक डॉ. सुजित नेवसे, वनपरिक्षेत्र अधिकारी संजय वाघमारे यांच्या मार्गदर्शनाखाली वनपाल पी. पी. सूर्यवंशी, वनरक्षक श्रीमती मरशिवणे, वनसंरक्षक एस. के. खंदारे, वनमजूर भरत वाघ, वाहनचालक अशोक शिंदे यांनी काळविटांवर चांदवड वनविभाग कार्यालयाच्या वसाहत हद्दीत अंत्यसंस्कार केले.