नाशिक : मालेगाव शहराला कोरोनाचा घट्ट विळखा पाहता सबंध राज्य शासन जागृत झाले आहे. तासातासाला मालेगावचा आढावा घेतला जात आहे. या शहरात सध्या कोरोनाचे 299 रुग्ण असुन ही संख्या अवघ्या चार दिवसांत दुप्पट झाली आहे. या पार्श्‍वभूमीवर राजकीय नेत्यांना पुन्हा एकदा त्यात नवा वाद निर्माण करण्याची संधी मिळाली आहे. यासंदर्भात स्थानिक नेते अद्वय हिरे यांनी थेट पंतप्रधान नरेंद्र मोदी यांना मेल केला आहे. मालेगाव हा कोरोनाचा हॉटस्पॉट नव्हे तर जिवंत बॉम्ब बनला आहे. त्यामुळे येथे लष्कर पाठवा अशी विनंती त्यांनी केली आहे.

21 तारखेनंतर पॉझिटिव्ह रुग्णांचे वाढले प्रमाण

गेल्या 34 दिवसांत जिल्ह्यात कोरोनाचे 299 रुग्ण झाले असून, गेल्या चार दिवसात कोरोनाचे सुमारे दीडशे रुग्ण पॉझिटिव्ह आल्याने जिल्हा तीनशेच्या नजीक पोहोचला आहे. नाशिक जिल्ह्यात कोरोना पॉझिटिव्ह आलेला पहिला रुग्ण गेल्या 27 मार्च रोजी निष्पन्न झाला. त्यानंतर सातत्याने कोरोना रुग्णामध्ये वाढ होत गेली. एप्रिल महिन्याच्या मध्यात कोरोना रुग्ण पॉझिटिव्ह येण्याची तीव्रता वाढली. त्यानंतर ती कमी झाली. मात्र महिन्या अखेरीस त्याची तीव्रता अतिशय वेगाने वाढत गेली आहे. त्यामुळे एप्रिलच्या मध्याला जिल्ह्यात 55 कोरोनाचे रुग्ण होते. तर 21 तारखेनंतर पॉझिटिव्ह रुग्ण मिळण्याचे प्रमाण वाढत गेले. 28 एप्रिल ते 1 मे या दरम्यान तब्बल सुमारे दीडशे रुग्ण वाढल्याने आजमितीस जिल्ह्यात 299 कोरोनाचे रुग्ण आहेत.

हेही वाचा > ह्रदयद्रावक! "करपलेल्या जखमी पायांनी लांब अंतर कापतोय खरं..पण घरात घेतील ना?"

मालेगावचा की हॉटस्पॉट राजकीय हॉटस्पॉट

काही दिवसांपूर्वी येथील भाजपचे खासदार डॉ. सुभाष भामरे यांनी देखील केंद्र शासनाला पत्र लिहून अशीच मागणी केली होती. श्री. हिरे हे विधानसभा निवडणूकीत राष्ट्रवादी कॉंग्रेस पक्षात प्रवेश केलेले माजी मंत्री प्रशांत हिरे यांचे पुत्र तर माजी आमदार डॉ. अपूर्व हिरे यांचे भाऊ आहेत. स्थानिक शिवसेनेचे आमदार व राज्याचे कृषीमंत्री दादा भुसे यांचे ते विरोधक आहेत. या पार्श्‍वभूमीवर त्यांचे आरोप गंभीर आहेत. त्यावरुन मालेगावचा हा हॉटस्पॉट राजकीय हॉटस्पॉट होऊ नये ही अपेक्षा आहे. कोरोनाचे संकट व त्यासाठी प्रशासन, राज्य शासन करीत असलेले गंभीर उपाय अधिक महत्वाचे व आवश्‍यक आहेत. मालेगाव शहरात अवघ्या 34 दिवसात कोरोनाने कहर केला आहे. प्रशासनाने वारंवार आवाहन करुनही स्थानिक नेते, आमदार आणि नागरीकांनी त्याकडे दुर्लक्ष केले. पुरेशी काळजी व सोशल डिस्टन्सिंगकडे कानाडोळा केला. त्यामुळे आज येथील रुग्णसंख्या 299 वर पोहोचली आहे. कोरोना विषाणूचा कहर जिल्ह्यात दिवसागणिक वाढतो आहे. 

हेही वाचा > ह्रदयद्रावक! कुणीतरी वाचवा हो, माझ्या बाळाला!...काळजाच्या तुकड्याला रक्ताच्या थारोळ्यात बघून मातेचा आक्रोश..