नाशिक : नायलॉन मांजामुळे महिलेचा मृत्यू झाल्यानंतर गडबडून जाग आलेल्या पोलिस यंत्रणेने नायलॉन मांजा विक्री प्रकरणी कारवाया सुरू केल्या आहेत. गुरुवारी शहरातील विविध भागांतील पाच मांजा विक्रेत्यांवर गुन्हे दाखल करण्यात आले. तसेच नायलॉन मांजा विक्री प्रकरणी पोलिसांनी माहिती देण्याचे आवाहन केले आहे. 

महिलेच्या मृत्यूनंतर पोलीस यंत्रणेला जाग

द्वारका परिसरात उड्डाणपुलावर नायलॉन मांजामुळे दुचाकीवरून चाललेल्या महिलेचा मृत्यू झाला. जीवघेण्या मांजामुळे बळी गेल्यानंतर शहर पोलिस सतर्क झाले आहेत. पोलिसांनी गुरुवारपासून नायलॉन मांजा विक्रेत्यावर कारवाया सुरू केल्या आहेत. गुरुवारी पोलिस उपायुक्त विजय खरात यांच्या मार्गदर्शनाखाली सातपूर, अंबड, इंदिरानगर, उपनगर आणि नाशिक रोड पोलिस ठाण्याच्या हद्दीतील मांजा विक्रेत्यांवर छापे टाकून पोलिसांनी कारवाया केल्या. त्यात सातपूरला ३५० रुपयांचे मांजाचे पाच रीळ, इंदिरानगरला पाच रीळ, उपनगरला दोन हजार ४०० रुपयांचे आठ रीळ, नाशिक रोडला ३० रीळ याप्रमाणे सहा हजार १५० रुपयांचे ४८ रीळ जप्त करण्यात आले. 

हेही वाचा - ह्रदयद्रावक! केवळ लेकरासाठीच मातेचे कष्ट अन् धडपड; नियतीचा घाला आला आणि सहा वर्षाचं लेकरू झालं पोरकं

पोलिसांना कळवा 
शहर पोलिसांनी शहरातील नायलॉन मांजा विक्रीला प्रतिबंध केला असून, अवैधपणे नायलॉन मांजा विक्री होत असल्याचे आढळल्यास, नागरिकांनी शहर पोलिसांच्या ०२५३-२३०५२३३ किंवा ०२५३-२३०५२५४ या नियंत्रण कक्षातील दूरध्वनी क्रमांकावर माहिती देण्याचे आवाहन केले आहे.

हेही वाचा - सरपंचपद भोगल्यानंतर भयाण वास्तवाचा सामना! माजी सरपंचांवर आज मजुरीची वेळ