झोडगे (नाशिक) : मासेमारीसाठी लागणारे जाळे विणणारे कारागीर भगवान मोरे मासेमारीसह जाळे विणून तयार जाळ्याची विक्री करून रोजगाराची संधी निर्माण करीत आहे. कोरोना संकटकाळात एकीकडे अनेकांचा रोजगार हिरावला गेला असताना दुसरीकडे मोरे यांची ही जिद्द कौतुकास्पदच म्हणावी लागेल. 

मागील पिढीकडून कला अवगत...

यंदाच्या हंगामात अतिपावसाने अनेक ठिकाणी नदी-नाल्यांसह धरण, तलाव, शेततळे, बंधारे, विहिरींना मुबलक प्रमाणात पाणी उपलब्ध असल्याने यंदाच्या हंगामात मोठ्या प्रमाणात मासेवाढीसाठी पोषक असे वातावरण निर्माण झाले आहे. तसेच गावतलाव, धरणे, बंधारे, शेततळ्यांमध्ये अनेक ठिकाणी मोठ्या प्रमाणावर मत्स्यबीज सोडण्यात आले. अशा ठिकाणी मासेमारीसाठी जाळ्याचा वापर केला जातो. मासेमारी करणारे व्यावसायिक कारखान्यात तयार करण्यात आलेले जाळे खरेदी करून मोठ्या प्रमाणावर मासेमारीसाठी वापरतात, तर पारंपरिक पद्धतीने मासेमारी करून उदरनिर्वाह करणारे व्यावसायिक हाताने विणलेल्या जाळ्याचा वापर करून मासेमारी करतात. मासेमारीसाठी लागणारे जाळे पारंपरिक पद्धतीने विणण्याची कला मागील पिढीकडून अवगत करून जाळे विणले जाते. 

हेही वाचा >  साईबाबांच्या दर्शनाची इच्छा अपूर्णच; बाईकवरून शिर्डीवर निघालेल्या तीन तरुणांवर काळाचा घाला

गरजेनुसार जाळे बनविण्याकडे कल... 

मासेमारीसाठी लागणारे जाळे नायलॉन दोरीने बनविले जाते. १२ फूट लांबीचे जाळे बनविण्यासाठी सुमारे पंधराशे रुपये खर्च येतो, तर तयार जाळे दोन हजार ५०० रुपयांपर्यंत विक्री होत असल्याने मासेमारीसह जाळे विक्रीतून रोजगार उपलब्ध होत आहे. मासेमारीसाठी लागणारे जाळे मागणीनुसार लहान-मोठ्या आकाराचे बनवून दिले जात असल्याने गरजेनुसार जाळे बनवून घेण्याकडे व्यावसायिकांचा कल दिसतो.  

हेही वाचा > निर्दयी मातेनेच रचला पोटच्या गोळ्याला संपविण्याचा कट; अंगावर काटा आणणारा संतापजनक प्रकार उघड